Suriya lideri hazırkı əlverişli situasiyada rəqiblərinin bir-birini zəiflətməsini müşahidə edir

Hazırda dünyanın diqqəti Suriyada, daha dəqiqi ölkənin şimalında, Türkiyə ilə sərhəddə yerləşən Kobani şəhərinə cəmləşsə də, Bəşər Əsəd müəyyən qədər arxa plana keçib. Çünki indi meydanda İŞİD-dir. Terror təşkilatı fəallaşaraq sərhəddə yerləşən və strateji olaraq böyük əhəmiyyət daşıyan Kobanini ələ keçirməyə çalışır. Kobani isə kürdlər üçün mühüm əhəmiyyət daşıyır və bu şəhəri qorumaq üçün az qala bütün region kürdləri səfərbər olub.

Bəşər Əsəd müəyyən mənada diqqətdən kənarda qalıb

Qeyd edək ki, Bəşər Əsəd ötən il Suriyanın şimalından qoşunlarını geri çəkmişdi. Səbəb isə sadə idi. Bölgədə İŞİD, kürdlər, "ən-Nusra” və islamçı yaraqlılar, nəhayət, Azad Suriya Ordusunun qüvvələri yayılmışdı və Suriya ordusunun az qala hər kəndi müdafiə etmək imkanı yox idi. Eyni zamanda artıq bu qüvvələrin də öz aralarında münaqişə vardı və ordunun burda olmaması onsuz da bu qruplar arasında nüfuz savaşına səbəb olacaqdı. Belə də oldu. Suriya ordusu çəkildikdən sonra Suriyanın şimalı müxalif qüvvələr arasında döyüş meydanına çevrildi. İndi isə döyüşlər çox şiddətli şəkildə davam edir və Suriya ordusu, Bəşər Əsəd müəyyən mənada diqqətdən kənarda qalıb, baxmayaraq ki, ara-sıra hökumət qüvvələri Hums və Rəqqa şəhərləri ətrafında müxalif qüvvələrə qarşı əməliyyatlar keçirir.

Bəşər Əsəd ordunu gücləndirməyə çalışır

Hazırda davam edən vəziyyətdən istifadə edərək Bəşər Əsəd ordunu gücləndirməyə çalışır. Qərb mətbuatının yazdığına görə, Suriya hökuməti yaşı 35-dən az olan ölkə vətəndaşlarını orduya cəlb etmək üçün yeni kampaniya başladıb. Hərbi xidmətdən yayınan 1980-1990-cı il təvəllüdlü insanlar yollarda qurulmuş postlarda saxlanılaraq orduya göndərilir. Britaniyanın "Times” qəzeti yalnız bazar ertəsi Dəməşq və Hama şəhərlərində həyata keçirilən axtarış əməliyyat tədbirlərindən sonra 1500 suriyalının saxlanılaraq orduya göndərildiyini bildirilir.

Suriyanın şimalında döyüşlərin daha da uzanması müəyyən mənada şərqdə çaxnaşma yaratmaq istəyən Qərbin ziyanına, B.Əsədin isə maraqlarına uyğundur

Suriyanın şimalında döyüşlərin daha da uzanması müəyyən mənada şərqdə çaxnaşma yaratmaq istəyən Qərbin ziyanına, B.Əsədin isə maraqlarına uyğundur. Çünki davam edən döyüşlər müxalifləri zəiflədir və onların ləğv edilməsi imkanlarını artırır. Bu həftə Azad Suriya Ordusunun Kobanidə İŞİD-ə qarşı döyüşlərə qoşulması regionda müxalif qüvvələr arasında döyüşlərin daha da genişlənəcəyini deməyə əsas verir.

İstənilən halda zaman və şərtlər Suriya liderinin xeyrinə işləyir

Bu vəziyyət Bəşər Əsədin tədricən ordunu gücləndirmək, Dəməşq ətrafında və qərb, eləcə də şimal-qərb bölgələrində mövqelərini möhkəmləndirmək üçün imkan verir. B.Əsəd isə göründüyü kimi, bu fürsətdən yararlanmağa çalışır. İstənilən halda zaman və şərtlər Suriya liderinin xeyrinə işləyir. Sadəcə, qarşıdakı müddətdə B.Əsəd daxili və beynəlxalq dəstəyini itirməyəcəyi təqdirdə müxaliflərinin böyük qismindən qurtula biləcək. Kobaninin İŞİD tərəfindən alınması terror təşkilatına qarşı müharibəni daha da genişləndirəcək və koalisiya İŞİD-i məhv etmək üçün bütün imkanlarını sərf edəcək. İŞİD-in məğlub olaraq zəiflədilməsi, hətta tamamilə sıradan çıxarılmasından sonra belə ASO ilə kürdlər arasında davamlı ittifaq mümkün deyil. Çünki kürdlər yenidən ASO kimi qurumların tərkibinə daxil olmaq istəmirlər.

Qərb məcburən Bəşər Əsədi dəstəkləməyə məhkumdur

Qərb dövlətləri də anlayırlar ki, istənilən halda müəyyən mənada legitim, Suriyada dövləti qoruyub saxlamağa, bütün tərəfləri birləşdirməyə qadir olan yeganə qüvvə Bəşər Əsəd hökumətidir. Artıq Qərb ekspertləri, nüfuzlu siyasətçilər hökumətlərə bu yöndə çağırışlar edirlər. Ancaq hazırkı şərtlərdə Qərb ölkələrinin siyasi kursu real deyil, lakin davam edən proseslər göstərir ki, bir növ dəyişikliyə məhkumdurlar.

Birlik.az