Livan parlamenti son 6 ayda ölkədə prezidentin seçilməsi istiqamətində 10-dan çox toplantı keçirsə də heç birində nəticə hasil olmayıb.

 İnterAz-ın Livan mətbuatına istinadla verdiyi xəbərə görə, ölkənin prezidentsiz idarə edilməsi artıq yeddinci aya daxil olub.

 Ekspertlərin fikrincə Livanda olan 18 siyasi fraksiya, cəmiyyət, din və məzhəblərin parlamentdəki nümayəndələri mütəşəkkil koalisiyalar təsis edə bilmədiklərindən, bu ölkədə siyasi rəqabət analoqu olmayan şəkildə davam etməkdədir.

 Hazırda prezidentliyə namizədliyi irəli sürən şəxslər arasında "14 Mart” siyasi blokunun sədri Samir Cəcə, "8 Mart” cinahının namizədi və "Hizbullah”ın dəstəklədiyi Mişel Oun əsas rəqib kimi seçim obyektindədirlər. Prezident 128 səsdən üçdə-ikisini əldə etməlidir ki, livan ekspertlərinin fikrincə bu da qeyri-mümkündür. 

Bildirək ki, Livan Parlamentinin siyasi qüvvələri arasındakı ənənəvi rəqabət Suriyadakı daxili müharibədən sonra daha gərgin vəziyyət alıb. Ötən əsrdə Livanda sünni fraksiyaları ilə xristian siyasi blokları arasında rəqabət var idisə, son on ildə bu rəqabətə "Hizbullah” da qoşulub. "Hizbullah”ın hərbi baxımdan üstünlüyü, İsraillə döyüşlərə girərək, Livan torpaqlarını işğaldan azad etməsi təşkilatın nüfuzunu daha da artırıb.