ABŞ-ın Missuri ştatında daha bir qaradərili gənc polis tərəfindən güllələnərək qətlə yetirilib.

İnsident avqust ayında Maykl Braun adlı gəncin qətlə yetirildiyi Seynt Luiz rayonunda baş verib.

Yerli polis orqanının açıqlamasına görə, yanacaq doldurma məntəqəsində əlində odlu silah olan qaradərili gənc polisə qarşı hədələyici rəftar edib və əlindəki silahı polisə tuşlayıb. Bundan sonra polis həmin gəncə atəş açıb. Polisin sözlərinə görə, onlar iki nəfər olub və biri güllələndikdən sonra digəri hadisə yerindən qaçıb.

Berkeley məntəqəsində baş verən insidentdən sonra ərazi yenidən etirazçı kütlə ilə dolub. Polis qüvvələri etirazçıları dağıtmağa nail olub.

Qeyd edək ki, Berkeley məntəqəsi avqustda Maykl Braunun qətlə yetirildiyi Ferquson məntəqəsinin yaxınlığında yerləşir.

Öldürülən şəxsin 18 yaşlı, Antonio Martin adlı gənc olduğu bildirilir. (topnews.az)