Yunanıstanın "karfitsa.gr" xəbər portalında Ermənistanın Qarabağda törətdiyi bəşəri cinayətlərlə bağlı yazı dərc olunub.
Xeberle.com xəbər verir ki, "Qala” Yunanıstan-Azərbaycan Dostluq Cəmiyyətinin sədri Rəşid Məmmədovun dəstəyi ilə yayımlanan yazıda öncə Ermənistanın Vətən müharibəsi dönəmində mülki əhaliyə qarşı törətdiyi terror aktlarından bəhs edilir.
Bundan başqa, işğalçı ölkənin Azərbaycanın Gəncə, Bərdə və digər şəhərlərinə raket zərbələri endirməsi nəticəsində uşaqlar və qadınlar daxil olmaqla mülki əhalinin qətlə yetirilməsi, evlərin və digər sosial obyektlərin dağıdılması yunanıstanlı oxucuların diqqətinə çatdırılıb.
Həmçinin müharibə sona çatdıqdan, Ermənistan kapitulyasiyaya imza atandan sonrakı dönəmdə ermənilərin təhvil verdikləri tarixi ərazilərimizdə evləri yandırması, hətta heyvanları belə vəhşicəsinə öldürməsi də yazıda yer alır. Qeyd edilir ki, vandallar tarixi abidələrimizi talan edərək, meşələrə od vuraraq ekoloji terrorlar da törədiblər. Bununla bağlı faktlara geniş şəkildə təqdim edilib. Yazıda Ermənistanın təcavüzü nəticəsində Dağlıq Qarabağ və onun ətrafında olan rayonlarda dünya və yerli əhəmiyyətli tarixi abidələrin, muzeylərin soyğuna məruz qalması, həmçinin infrastruktura ciddi zərər verilməsi, məktəblərin, xəstəxanaların yerlə yeksan edilməsi, yaşayış evlərindəki köhnə materialların belə sökülərək Ermənistana daşınması diqqətə çatdırılır. Eyni zamanda qeyd olunur ki, Ermənistanın təcavüzü nəticəsində dəyən maddi ziyan ilkin hesablamalara görə, 800 milyarddan çoxdur. Bu rəqəm getdikcə artır və Ermənistanın təzminat ödəməli olduğu vurğulanır:
"Bunlar təkcə Azərbaycana qarşı deyil, bəşəriyyətə qarşı yönəlmiş terror aktlarıdır. Bu gün dünyada çoxsaylı münaqişə ocaqları mövcuddur. Bu səbəbdən də Ermənistanın mülki əhaliyə və ekoloji mühitə qarşı törətdiyi bu terror aktı çox təhlükəli tendensiyadır. Ona görə də bu cür vəhşiliklərin davam etməməsi, digər yerlərdə də presedent yaratmaması üçün beynəlxalq ictimaiyyət, xüsusilə xarici media buna duyarsız qalmamalıdır. Bu hadisənin daha çox işıqlandırılmasına, həqiqətin dünya ictimaiyyətinə çatdırılmasına ciddi ehtiyac var...”.
Qeyd edək ki, məqalə jurnalist Əli Zülfüqaroğlu və tədqiqatçı-ekspert Elnur Eltürkün həmmüəllifliyi ilə dərc edilib
Xəbərdən istifadə edərkən istinad etmək vacibdir.
