ABŞ və Avropada terror aktlarının neçə faizini müsəlmanlar törədir? Düşünürük ki, tapa bilməyəcəksiz…

"Bütün müsəlmanlar terrorist deyil, lakin bütün terrorçular müsəlmandırlar”. Bu cümləni neçə dəfə eşitmisiz? Fox News-un aparıcısı Brayan Kilmil bir müddət əvvəl bu fikri səsləndirdi. Çoxları onunla razı olmasalar belə - xüsusilə də ötən həftələrdə terrorizm üzrə "ekspertlərdən” birinin qeyri-müsəlmanlara İngiltərənin Birminhem şəhərinə girməsinin qadağan olunduğununu uydurmasından sonra. 

Lakin həyəcan doğuran məsələ odur ki, bəzi, hətta kifayət qədər ağıllı adamlar da yuxarıda səslənən bəyanatla razıdırlar. 

Şərhlərdə tez-tez belə suala rast gəlmək olar: bəs nə üçün biz heç zaman xristian, buddist yaxud yəhudi terrorçular barədə eşitmirik?

Aydındır ki, özlərini həqiqətən müsəlman hesab edən və İslam adına dəhşətli əməllər törətmiş insanlar var. Digər müsəlmanlar onların hərəkətlərinin dinə heç bir aidiyyatının olmadığını, yalnız siyasi etiqadlarından irəli gəldiyini söyləyə bilərlər. Lakin bununla belə, onlar müsəlmandırlar və bunu təkzib etməyin mənası yoxdur.
Bəlkə də indi deyəcəyim fakt da çoxlarını şoka salacaq – ABŞ və Avropada terror aktı törədənlərin əksəriyyəti müsəlman olmayanalardır. Siz bu faktı bilmirdinizsə, bu, sizin günahınız deyil və əminliklə kütləvi informasiya vasitələrini ittiham edə bilərsiniz.

Maraqlanan üçün bəzi statistik məlumatlar. Avropadan başlayaq. Bilmək istəyirsiniz son 5 ildə törədilən terror aktlarının neçə faizi müsəlmanların payına düşür? Əgər ağlınızdan "2 faizdən az bir hissəsi” fikri keçibsə, deməli düz tapdınız.

Avropol (Avropa polisi) ötən il dərc etdiyi məruzəsində qeyd edir ki, Avropada terror aktlarının əksəriyyətini separatçı qruplaşmalar törədiblər. Məsələn, 2013-cü ildə Avropada 152 terror aktı törədilib və onlardan yalnız ikisi "dini zəmində” olub, digər 84 terror aktı isə etnik-millətçi və separatçılıq mülahizələrindən irəli gəlib.     

Separatçı qruplaşmalardan fransızların Korsika adasında müstəqil dövlətin yaradılması uğrunda mübarizə aparan FLNC-ni göstərmək olar. 2013-cü ildə FLNC-nin terrorçuları Fransanın iki şəhərində polisə silahlı hücum ediblər. 

2013-cü ilin sonunda Yunanıstanda Populyar İnqilabi Qüvvələrə aid yaraqlılar "Qızıl məşriq” siyasi partiyasının iki üzvünü güllələyiblər.

İtaliyada anarxist FAİ qruplaşması jurnalistlərə bomba göndərilməsi də daxil olmaqla, müxtəlif terror hücumlarında iştirak edir.

Bu siyahını davam etdirmək də olar.

Bəs siz bu hadisələr barədə eşitmisiz? Yəqin ki, yox. Lakin terror aktını müsəlmanlar törədərlərsə, sizin fikrinizcə, kütləvi informasiya vasitələri bunu gizlədəcəklərmi? Bu ritorik suala cavab verməyə ehtiyac yoxdur.

Hətta 2011-ci ildə Avropada ən pis terror hücumları – Norveçdə Anders Breyvikin 77 nəfəri öldürərək, beləliklə də, müsəlmanlar və Avropa İttifaqının immiqrasiya siyasətinə etiraz etməsi, öz bəyanatında isə "xristian Avropası” qurmağa səsləməsindən sonra, mətbuat bu hadisəni nə dərəcədə fəal işıqlandırırdı? Bəli, bu dəhşətli faktla bağlı yazırdılar, lakin terrorçunun müsəlman olduğu hallarda yazdıqları qədər yox. Üstəgəl görünmürdü ki, ekspertlər gələcəkdə belə hadisələrin təkrarlanmaması üçün xristian terrorçuları necə dayandırmaq barədə danışsınlar. Bundan başqa, Breyvikin "xristian terrorçusu” olması barədə gümanlar belə kəskin reaksiyaya səbəb oldu.

Bəs siz buddist terrorçular barədə eşitmisiz? Bu arada buddistlər Birmada xeyli sayda dinc müsəlmanı öldürüblər, bir neçə ay əvvəl isə onlardan bəziləri Şri-Lankada müsəlmanların evlərini və onlara məxsus obyektləri yandırdılar, dörd müsəlmanı isə öldürdülər.

Yaxud siz yəhudi terrorçular (onların adını çəkməyə də cəsarət edək) barədə eşitmisiz? ABŞ Dövlət departamentinin 2013-cü ildə terrorizm haqqında hesabaında yəhudi sakinlərin törətdikləri 399 terror aktı da xatırlanıb. Həmin yəhudi terrorçular mülki fələstinlilərə hücum edib, 93 nəfər bədən xəsarətləri yetirib, onlarla məscid və xristian kilsəsində vandalizm aktları törədiblər.

ABŞ-da müsəlmanların törətdikləri terror aktlarının faizi Avropada olduğu kimi cüzidir. Federal Təhlükəsizlik Bürosunun (FBİ) 1980 və 2005-ci illərdə ABŞ ərazisində törədilmiş terror aktları ilə bağlı apardığı araşdırması bu əməllərin 94%-nin müsəlman olmayan şəxslər tərəfindən törədildiyini göstərib. 

2014-cü ildə Şimali Karolina Universitetinin apardığı tədqiqatlar, 11 sentyabr terror aktlarından sonra islam terrorizminin cəmi 37 amerikalının həyatına son qoyduğunu, həmin dövrdə isə 190 mindən çox amerikalının öldürüldüyünü göstərib. 

2013-cü ildə Boston marafonu zamanı üç amerikalı öldürüldü, həmin ildə isə beş azyaşlı uşaq təsadüfən silahdan açılan atəşdən dünyasını dəyişdi.

Lakin mətbuat qeyri-müsəlmanların hücumlarını gizlədərək, susmaqdadır. Bəs nə üçün? Hər şey çox asandır – bu, biznesdir. "Qorxulu” yadellilər haqqında əhvalatlar daha yaxşı satılır, yaxşının pis ilə mübarizəsi isə - burada yaxşı amerikalı oğlan, pis isə bir müsəlmandır – daha sadədir və adi vətəndaş tərəfindən anlaşıqlı qəbul edilir.

Düzünü deyin, sonuncu dəfə mətbuatda hamiləliyin süni dayandırılması üzrə əməliyyatlar keçirən klinikalara hücum barədə nə vaxt oxumusuz? Halbuki belə hücumlar abortla məşğul olan hər beş klinikadan birində qeydə alınır. Belə əhvalatları satmaq olmur, axı burada çoxları üçün narahatçılıq yaradan "aramızdakı düşmən” haqqında fikir peyda olur.

Elə eyni səbəbdən biz hər gün 30-a yaxın amerikalının silahlı hücum nəticəsində ölməsini, həmçinin hər üç qadından birinin ailə zorakılığının qurbanı olmasını görmürük. Lakin mətbuatda biz yalnız və yalnız bu dəhşətli, amerikalıları öldürən müsəlmanları necə dayandırmaq barədə danışan, lakin bir amerikalının üzərinə soyuducu aşmasından ölmə ehtimalının daha çox olduğu faktını xatırlatmayan ekspertləri görə bilirik. 

Bu məqalə yəqin ki, mətbuatın silahlandığı biznes-modeli dəyişməyəcək. Lakin biz ümid edirik ki, bir çox insanlar bütün müsəlmanların terrorçu olmadığını və əslində onların çox az bir faiz təşkil etmələrini anlayacaqlar. Biz islam radikallarından gələn təhlükəni qulaqardına vurmağı istəmirik. Biz sadəcə deyirik – arabir soyuducuya tərəf də baxın...

(oxu.az)