"Taliban” qruplaşması üç aylıq atəşkəs təklifi ilə çıxış edib.
Xeberle.com "TASS"a istinadən xəbər verir ki, bunu Dohada "Taliban”la danışıqlarda iştirak edəcək Əfqanıstan hökumətinin nümayəndəsi Nadir Nadiri deyib.
Onun sözlərinə görə, üç aylıq atəşkəs təklifi müqabilində qruplaşma daha əvvəl həbs olunan 7 min yaraqlının azad edilməsi tələbini irəli sürüb.
"Bu, ciddi bir tələbdir. Artıq 5 min "Taliban” üzvünün həbsdən azad edilməsinin vəziyyəti yaxşılaşdırmadığını və hətta gərginləşdirdiyini gördük”, - o bildirib.
Mətbuat konfransı Əfqanıstan nümayəndə heyətinin danışıqlar üçün Dohaya səfərindən əvvəl keçirilib. Ötən ilin sentyabr ayından bəri davam edən danışıqlar bir neçə dəfə dayandırılıb. Bu yaxınlarda yenidən bərpa olunub.
Doha görüşündə 11 nəfərlik Kabil nümayəndə heyətinin tərkibində Əfqanıstanın keçmiş prezidenti Həmid Karzai və Milli Barışıq Ali Şurasının sədri Abdullah Abdullahın yer alacağı da gözlənilir. "Taliban" nümayəndə heyətinə əsas danışıqları aparan Əbdül Qani Baradar rəhbərlik edəcək.
Xatırladaq ki, ABŞ və NATO qoşunlarını Əfqanıstandan çıxarmağa başlayandan ölkədə vəziyyət pisləşib. "Taliban" ölkənin böyük hissəsində nəzarəti ələ aldığını iddia edir.
Xəbərdən istifadə edərkən istinad etmək vacibdir.
