Böyük Britaniya cümə axşamı sanksiyaları genişləndirərək, daha 7 rusiyalı iş adamını "qara siyahı”ya salıb.
Xeberle.com xəbər verir ki, Birləşmiş Krallığın Xarici İşlər Nazirliyinin dərc etdiyi sənədə görə, "Rosneft” şirkətinin rəhbəri İqor Seçin, "Qazprom”un rəhbəri Aleksey Miller, "VTB Bank"ın rəhbəri Andrey Kostin, Londonun "Çelsi” futbol klubunun sahibi Roman Abramoviç, iş adamı Oleq Deripaska (EN+ Group), "Bank Rossiya”nın Direktorlar Şurasının sədri Dmitri Lebedev və "Transneft"in rəhbəri Nikolay Tokarev sanksiyalara məruz qalıb.
Bu şəxslərin hamısının Böyük Britaniya ərazisinə girişi qadağandır, onların həmin ölkədəki aktivləri dondurulur. Onlara həmçinin Britaniyanın fiziki və hüquqi şəxsləri ilə işləmək qadağandır ki, bu da Abramoviçin "Çelsi” klubunu satmasını xeyli çətinləşdirə bilər.
"Qara siyahı"dakı ruslara məxsus təyyarələrin Krallığın ərazisində olduğu halda Britaniya hakimiyyət orqanları tərəfindən müsadirə olunması nəzərdə tutulur.
Böyük Britaniya hökumətinin Rusiya prezidenti Vladimir Putin və onun ətrafını təcrid etmək səylərinin bir hissəsi olaraq, bu oliqarxların Böyük Britaniyadakı ümumi dəyəri təxminən 15 milyard funt sterlinq olan aktivləri dondurulacaq.
"Onların bura səyahətləri qadağandır, Britaniya vətəndaşları və ya şirkətlər onlarla iş görə bilməz”, - Xarici İşlər Nazirliyinin bəyanatında deyilir.
Böyük Britaniyanın baş naziri Boris Conson tətbiq edilən sanksiyaları şərh edərkən, Ukraynadakı hərbi əməliyyatı dəstəkləyən Rusiya vətəndaşlarını təqib etməyə davam edəcəyinə söz verib.
"Bugünkü sanksiyalar Böyük Britaniyanın Ukrayna xalqına sarsılmaz dəstəyini göstərən son addımıdır", - Britaniya hökumətinin başçısı bildirib.
Xəbərdən istifadə edərkən istinad etmək vacibdir.
