Səudiyyə Ərəbistanlı imam Şeyx Bendər Əl Hayberi dünyanın fırlanmadığını deyib. Onun bu fikri sosial şəbəkələrdə geniş müzakirələrə yol açıb.

Panellərin birində tələbələrin "Dünya fırlanırmı?” sualına cavab verən Əl Hayberi "Dünya yerində sabit dayanıb, hərəkət eləmir” deyib. İmam daha sonra dünyanın fırlanmadığını sübut etmək üçün önündəki plastik su qabını göstərək deyib: "Tutalım hava limanından Çinə uçuruq. Deyirsiz dünya fırlanır. Mənə diqqət edin (su qabını göstərir) bu dünyadır. Əgər dünya fırlanırsa təyyarə havada dayandığında Çin təyyarəyə doğru gəlməlidir. Düzdürmü? Yox, əgər Yer kürəsi əks tərəfə dönsə onda təyyarə heç vaxt Çinə çatmazdı. Çünki Çin də təyyarə kim fırlanacaqdı. ”

Sələfilərin lideri Hacı Qamət Süleymanov "Qafqazinfo”ya açıqlamasında bu fikrə münasibət bildirib.  Q.Süleymanov da Səudiyyə imamının fikrini təsdiqləyib: "Yer kürəsinin fırlanması haqda İslam alimləri deyib ki, fırlanmır. Onlar da Qurandakı bir neçə ayəyə istinad edib. Məsələn, "Yer üzü sabitdir”, "Göydə nə varsa, hamısı üzür” ayələrini misal çəkmək olar. Amma Yer üzünün fırlanması haqda heç nə deyilməyib. Alimlər burdan nəticə çıxarıblar ki, Yer üzü sabitdir və fırlanmır.  Məsələn, Bakıdan təyyarəyə minib Amerikaya gedirsən. Təyyarə havada dayananda, Amerika özü sənin yanına gələcək. Amma Amerika sənin yanına gəlmir. Məcbur olursan ki, Amerikaya 7-8 saat uçasan. Əgər bu fırlanırsa, çıxaq yuxarıda dayanaq, hansı ölkəni istəyiriksə, bir neçə özü saata gələcək. Alimlərin gəldiyi nəticə budur”.

Q.Süleymanov Yerin fırlanıb-fırlanmadığı haqda özünün dəqiq bir fikri olmadığı deyib.  (kulis.az)