Türkiyə prezidenti Rəcəb Tayyib Ərdoğanın yeməyi laboratoriyada yoxlanacaq.

"The New York Times" qəzetində Ceylan Yeginsu bunu vaxtilə şah və fironların özünümüdafiə taktikası ilə müqayisə edir.

Ərdoğanın həkimi Dr.Cevdet Erdol bu həftə açıqlayıb ki, Ankaradakı 600 milyon dollarlıq dəbdəbəli sarayda 1500 otaqdan azı birində xüsusi yemək analizi laboratoriyası yerləşdiriləcək və prezident üçün hazırlanan yeməklərdə radioaktiv materialların olub-olmaması yoxlanacaq.

"Bilirik ki, dünyada qətllər daha silahla törədilmir, gizlicə olaraq yeməyin zəhərlənməsi yolu ilə həyata keçirilir” - Dr.Erdol "Hurriyet” qəzetinə müsahibəsində deyib. Gün ərzində 5 ekspert 14 saat növbədə duracaq və prezidentin yeməklərində şübhəli maddələrin analizini aparacaq.

Müəllif yazır ki, həkimin açıqlaması 10 ildən çox hakimiyyətdə olan Ərdoğanın aşırı dəbdəbə hərisliyi kimi yozulur: "Əlbəttə, dünyanın istənilən lideri ərzaq təhlükəsizliyi addımları atır, müasir Türkiyənin banisi Mustafa Kamal Atatürkün də yeməklərinin dadına baxan olub. Ancaq prezidentin həkiminin belə açıqlama verməsi, detalları açıqlaması nadir hadisədir. Bəzi təhlilçilər belə tədbirlərin qeyri-sabit regionda başadüşülən olduğunu deyir”.

Bir təhlilçi isə bu cür təhlükəsizlik tədbirlərinin demokratik ölkə üçün normal olmadığını bildirib. Müəllif eyni zamanda Türkiyənin səkkizinci prezidenti Turqut Özalın ailəsinin də onun zəhərləndiyinə inandığını qeyd edir.  (virtualaz.org)