"Moldova Qaqauziya muxtariyyətindəki seçkilərə Rusiyanın birbaşa müdaxiləsinin qarşısını almaqdan ötrü işlər görməlidir”. Bu açıqlama ilə Moldovanın keçmiş baş naziri Vlad Filat çıxış edib.   O, Kişinyovun Rusiya tərəfindən maliyyələşdirilən və seçicilərə təqdim edilən namizədlə bağlı Moskvaya ultimatum göndərməli olduğunu deyib:   "Biz çalışmalıyıq ki, heç kim bizim işimizə qarışmasın. Moldovanın Xarici İşlər Nazirliyi Moskvadan onun daxili işlərinə qarışmamasını tələb etməlidir”.   Qeyd edək ki, bir müddət öncə Moldova mətbuatında Qaqauziya muxtariyyətində başqanlığa namizədliyi irəli sürülən İrina Vlaxı Rusiya Federasiya Şurasının spikeri Valentin Matviyenkonun dəstəklədiyi haqqında məlumat yayılmışdı.   Qaqauziya muxtariyyəti ilə Kişinyov arasında münasibətlər keçən ildən pozulub. Ölkənin Avropa Birliyinə assosiativ üzv olmasını qəbul etməyən qaqauzlar həmin vədələr Avrasiya İttifaqına doğru yönələcəklərini bildirmişdilər. Üstəlik, Maydan hərəkatı, ondan sonra isə Ukraynanın cənub-şərqində hadisələrin aktivləşməsi Qaqauziyaya da qısa müddətdə rus diversantların gəlməsinə səbəb olmuşdu. Ekspertlər isə rus diversantların aktivləşməməsinin əsas səbəbinin onlara Moskvadan əmrin gəlməməsi ilə əlaqələndirmişdilər.  (Axar.az )