Günəş enerjisi ilə işləyən təyyarə dünya ətrafında səyahətə başlayıb. Gecə saatlarında belə Günəş batareyaları ilə qidalanan "Solar Impulse-2" adlı təyyarə dünya rekordu qeydə almaq üçün Birləşmiş Ərəb Əmirliklərinin paytaxtı Əbu-Dabidən havaya qalxıb və Oman istiqamətində uçub. 
Günəş təyyarəsi 5 ay ərzində çoxsaylı dayanacaqlarla əvvəlcədən müəyyən edilmiş marşrut üzrə Yer ətrafında səyahət edəcək. Biryerlik uçan aparatın pilotu isə növbə ilə sükan arxasına keçəcək iki isveçrəli olacaq. Bunlar ekoloji təmiz texnologiyaların həvəskarı olan Andre Borşberq və Bertran Pikardır. Dayanacaqlar pilotların istirahəti və təyyarənin təmiri üçün tələb olunacaq. 
Təyyarənin qanadının uzunluğu 72 metrdir ki, bu da, Boeing-747 təyyarəsinin qanadının uzunluğundan çoxdur. "Solar Impulse-2"nin ağırlığı isə cəmi 2,3 ton təşkil edir. 
"Solar Impulse-2" Günəş təyyarəsindən əvvəl istifadəyə verilən "Solar Impulse-1" aparatı 2013-cü ildə Şimali Amerika qitəsi üzərindən uçuş da daxil olmaqla, bir sıra dünya rekordlarına imza atmışdı. Lakin Yer kürəsi ətrafında dünya səyahəti üçün bu təyyarə münasib olmadığından, daha böyük ölçülü "Solar Impulse-2" adlı Günəş təyyarəsi inşa edilmişdi. (anspress.com)