"Rusiyada "güllələnmə siyahısı” tərtib olunub. Bu siyahıda Boris Nemtsovdan savayı Mixail Xodorkovskinin, Aleksey Venediktovun, mümkündür ki, hətta Kseniya Sobçakın da adı var”.

Bu sensasion bəyanatla Rusiyanın nüfuzlu "Novaya qazeta” nəşri çıxış edib.

Qəzetin yazdığına görə, hələ ötən həftənin ortalarında Putinə hər şey haqda məlumat verərək bildiriblər ki, müxalifətçi Boris Nemtsovun qətli hüquq-mühafizə orqanlarına öncədən bəlli imiş.

"Rusiyada "güllələnmə siyahısı” var. Boris Nemtsovla yanaşı Aleksey Venediktovun, Kseniya Sobçakın və Mixail Xodorkovskinin də adları o siyahıya daxil edilib. Bu adamların hər biri ilə bağlı işləyən bir neçə qrup var. Çeçenistandan olan killerlərin qaydasına görə, belə işlərdə azı iki qrup olmalıdır. Necə deyərlər, sanki tenderdir” - deyə qəzet yazır.

"Novaya qazeta” bildirir ki, Nemtsovun qətlinin təşkilatçılarının və icraçılarının bir çoxlarının adı Putinə də təqdim edilib: "Qatil heç də Zaur Dadayev deyil. Nemtsovun qətlinin mümkün təşkilatçısı Ruslan adlı bir mayordur. Onun soyadı prezident Putinə də məlumdur. Ruslanı martın 9-da Qroznı şəhərində sorğu-sual ediblər. Amma mətbuata bu barədə hər hansı informasiyanın sızmasının qarşısını alıblar. Bununla belə Ruslanın Çeçenistanın güc strukturlarında çalışan yüksək rütbəli vəzifəli şəxsin yaxın qohumu olmasına eyham vurulub.

Ruslanın soyadı "Novaya qazeta”nın redaksiyasına da bəllidir. Lakin biz təqsirsizlik prezumpsiyası hüququnu nəzərə alaraq onun soyadını hələ açıqlamırıq. Bütövlükdə isə Ruslanın soyadı, kimliyi həm Rusiya Federal Təhlükəsizlik Xidmətinin, həm DİN-in, həm də Rusiya İstintaq Komitəsinin onlarla əməkdaşına da bəllidir”.

Rusiya nəşri onu da qeyd edir ki, Ruslan adlı həmin mayor bir vaxtlar "Sever” batalyonunda da xidmət edib və dəfələlərə təltif olunub.

Xatırladaq ki, fevralın 27-də gecə saat 23:30 radələrində Moskvada 4 güllə vurulmaqla öldürülmüş rusiyalı müxalifətçi Boris Nemtsovun qətlində Rusiya DİN Daxili Qoşunlarının "Sever” adlı batalyonunun keçmiş komandir müavini Zaur Dadayev və həmin hərbi birləşmənin keçmiş döyüşçüsü Beslan Şavanov şübhəli bilinirlər.  (Virtualaz.org)