Sumqayıtın istiliklə təmin edilməsi prosesi niyə ləng aparılır?

Sinoptiklər bu il qışın sərt keçəçəyilə bağlı xəbərdarlıq edir. Məlumatlar içərisində dekabr ayında ölkə ərzisində 28 dərəcə şaxta olacağı barədə proqnozlar da var. Sərt hava şəraitinə alışıq olmayan Sumqayıt sakinləri qarlı-çovğunlu qış günlərində müxtəlif problemlərlə üzləşir. Sinoptiklərin sözügedən bədbin proqnozları indidən sumqayıtlıları qayğılandırıb. Sərt qış günlərində qaz, işıq, istilik, buzlu yollar, nəqliyyat çətinlikləri şəhər sakinlərinin üzləşdiyi ən böyük problemlərdir. Hər il yaşanan problemlərin aradan qaldırılması və soyuq günlərdə şəhərdə fövqəladə vəziyyətin yaranmamsı üçün əlaqədar qurumlar hansı tədbirlər görür? Ənənəvi, şablonlaşmış, amma çox vacib sual: Sumqayıt qışa hazırdımı?

Sumqayıt şəhər Qaz İstismar İdarəsinin baş mühəndisi Teymur Vəliyevin Xeberle.com-a verdiyi məlumata görə şəhər üçün ayrılan mavi yanacaq tələbatı ödəmir. Nəticədə şəhərin bir sıra ərazilərində sakinlər mavi yanacağın olmamasından əziyyət çəkirlər. Mülayim keçən hava şəraitində sumqayıtlılar mavi yanacaqla bağlı problemlər yaşayırsa, soyuq qış günlərində vəziyyətin necə olacağını söyləmək çətin deyil.

"Azəristiliktəchizat” ASC "Sumqayıtistiliktəchizat” idarəsinin baş mühəndisi Fəxrəddin İmanov isə portalımıza bildirdi ki, bu il 17-ci mikrorayon ərazisində 3-cü yarımstansiya istilik qazanxanası isitifadəyə verilib. 14 yaşayış binası və 1 uşaq bağçasının bu qış istiliklə təmin edilməsi nəzərdə tutulur. Amma istilik qazanxanasına qaz xəttinin çəkilişi başa çatmadığına görə yaşayış binası və uşaq bağçası istiliklə təmin edilməyib. Qazanxanaya qaz xəttinin çəkilməsi Sumqayıt şəhər Qaz İstismar İdarəsi tərəfindən aparılır. F.İmanov şəhərin tam olaraq istiliklə təmin edilməsi prosesinin ləng aparılması səbəbinin "Sumqayıtistiliktəchizat” idarəsindən asılı olmadığını bildirdi. Bizdən olsa, Sumqayıtın hər yerini istiliklə təmin edərik. Amma, şəhərdə istilik qazanxanalarının tikintisi "Azəristiliktəchizat” ASC tərəfindən həyata keçirilir.

"Sumqayıtelektrikşəbəkə” ASC elektrik şəbəkə xidmətinin rəisi Əhliman Mahmudov isə may ayından başlayaraq Sumqayıtın bir çox ərazilərində elektrik naqillərinin hardasa 60-70 faizinin yeniləndiyini bildirdi. Corat qəsəbə sakinlərinə elektrik enerjisi ötürən naqillərinin küləkli havalarda qırılması ilə bağlı şikayətlərinə cavab olaraq Ə.Mahmudov qeyd etdi ki, dənizin suyu duzlu olduğuna görə naqilləri çürüdür. Küləkli hava şəraitində naqillər bu səbəbdən tez qırılır. "Sumqayıtelektrikşəbəkə” ASC-nin müvafiq xidməti baş verən qəzaları vaxtında aradan qaldırmağa çalışır. Xidmət rəisinin məlumatından belə aydın oldu ki, soyuq havalarda şəhər sakinləri enerji ilə bağlı ciddi problem yaşamayacaqlar.

Ötən qış şəhərə qar yağanda Sumqayıtda kifayət sayda qar təmizləyən texnika və buzlu yollara qum səpən maşının olduğu bildirilirdi. Amma şəhərin mərkəzi küçələri texnika ilə deyil, əsasən "Təmizlik Departamenti”nin "canlı qüvvə”si - işçiləri tərəfindən təmizlədildi. Sumqayıt şəhər Mənzil Kommunal Təsərrüfat İstehsalat İstismar Birliyinin sədri Abid Əliyevlə əlaqə yaradıb "Qarlı havalarda çəkdiyimiz əziyyətlərin artıq keçmişdə qaldığını, yağan qarın miqdarından asılı olmayaraq nəqliyyatın hərəkətində məhdudiyyət yaratmayacaq” dediyini eşitmək istədik. Nə yazıq ki, birlik sədrinin telefonuna günlərlə etdiyimiz zənglər cavabsız qaldı.

Göründüyü kimi, Sumqayıtın qışa hazırlıqla bağlı bir çox poblemləri bu ildə həllini tapmayıb. Şəhər tam olaraq istiliklə təmin edilmədiyinə görə, sakinlər mənzillərini qızdırmaq üçün müxtəlif qızdırıcı vasitələrdən istifadə edirlər. Bu da dəm qazından boğulma təhlükəsini və elektrik xətlərinin yüklənməsini artıran başlıca amildir. Sosial obyektləri də nəzərə alsaq, enerji və mavi yanacaqdan istifadə edənlərin sayı artdıqca, tələbat da çoxalır. Nəticədə soyuqlu qış günlərində şəhər sakinləri bir çox problemlərlə üzləşir.
Sumqayıt şəhər Qaz İstismar İdarəsinin məsulu isə açıq-aşkar narahatlığını bildirir ki, ayrılan mavi yanacaq tələbatı ödəmir və əgər indiki günlərimizdə sumqayıtlılar mavi yanacaqla bağlı problemlər yaşayırsa, soyuq qış günlərində vəziyyətin necə olacağını söyləmək çətin deyil.
Bax belə, görünür ki, bu qış da Sumqayıt istilik təchizatı, mavi qazla bağlı problemlər yaşayacaq.
Bizə isə elə doğma və əzizlərimizin isti nəfəsinə qızınmaq, üşüməməyə, xəstələnməməyə ümid etmək qalacaq.

Aytən Əli,
Xeberle.com