Bu gün Gəncədə məcburi köçkünlər üçün salınan şəhərciyin açılışı olub. Tədbirdə Qaçqınların və Məcburi Köçkünlərin İşləri üzrə Dövlət Komitəsinin sədri, baş nazirin müavini Əli Həsənov və Gəncə şəhər İcra Hakimiyyəti başçısı Elmar Vəliyev iştirak edib.

APA-nın qərb bürosunun məlumatına görə, əvvəlcə qəsəbədə tikilən məktəb binası ilə, Kəlbəcər rayon İcra Hakimiyyəti aparatı üçün tikilən bina ilə tanışlıq olub. Qonaqlar qəsəbədə yaşayan kəlbəcərli ailənin evində olublar. Daha sonra isə açılış münasibəti ilə konsert proqramı təşkil edilib.

Qeyd edək ki, Gəncədə salınan şəhərcikdə 25 ədəd 5 mərtəbəli yaşayış binası, 1200 yerlik orta məktəb binası, 280 yerlik uşaq bağçası, inzibati bina, musiqi məktəbi, həkim məntəqəsi və yanğın deposu tikilib.

Gəncədə ümumi sayı 20 min nəfər olmaqla 5 min məcburi köçkün ailəsi var. Onların 70%-i şəhərdəki yataqxanalarda məskunlaşıb. Ailələrdən 1800-ü tələbə yataqxanalarında yaşayır ki, ilk mərhələdə yeni salınana şəhərciyə 1500 ailə köçürüləcək.