"Saray yolu” adlanan ərazidə işıqlandırma problemi hələ də davam etməkdədir. Bu yoldan istifadə edən sürücülərin yolun işıqlandırılmamasından şikayətləri son günlər daha da artıb. Gecə vaxtı bu yoldan keçmək bir neçə insanın həyatı bahasına başa gəlib. Yolun qaranlıq olması səbəbindən "saray yolu”nda yol-nəqliyyat hadisələri də tez-tez baş verir.
Saytımıza müraciət edən sakinlər qeyd edirlər ki, yollar o qədər qaranlıqdır ki, sürücü piayadanı, hətta digər maşını görməkdə belə çətinlik çəkir. Bu hal hər il neçə-neçə insanın canını alır.
Yolun inşası zamanı yol boyu işıq dirəkləri quraşdırılsa da, o dirəklərə elektrik enerjisi verilmir. Sürücülər gecə saatlarında həmin yoldan rahat və təhlükəsiz istifadə edə bilmirlər. Onlar yollarda işıq dirəklərinin olduğunu bildirsə də, həmin dirəklərin yalnız görüntü olaraq quraşdırıldığını deyirlər.
Qeyd edək ki, ötən il ölkə prezidenti "Yol hərəkətinin təhlükəsizliyinə dair 2019-2023-cü illər üçün Dövlət Proqramı"nın təsdiq edilməsi haqqında sərəncam imzalayıb. Məqsəd isə ölümlə və sağlamlığa zərər vurulması ilə nəticələnən yol-nəqliyyat hadisələrinin sayının, habelə ölkə iqtisadiyyatına və ekologiyasına dəyən ziyanın həcminin azaldılması üçün zəruri tədbirlər görməkdir.
Gecə lentə alınan görüntülərdə "Saray yolu”nun yenə qaranlığa qərq olunduğu görünür.
Elşən Yəhyayev
Xəbərdən istifadə edərkən istinad etmək vacibdir.
