Mövsüm dəyişikliyi insan
orqanizmində də müxtəlif dəyişikliklər yaradır. Təbiətin canlılığını itirdiyi
payızda insanlarda sanki hisslər zəifləyir, pessimistlik artır. Mövsüm
dəyişikliyi nəticəsində insanlar yaz-yay fəsillərində alışdıqları mühitdən
başqa bir mühitə düşür, tətilə gedən, əylənən insanlar daha çox iş-ev prinsipi
ilə yaşamağa başlayırlar. Payızda xüsusilə xroniki xəstəliklərin özünü büruzə
verməsi faktdır. İmmuniteti zəif olan insanlarda bu dəyişiklik özünü daha
qabarıq göstərir. Payızda hava-damcı
yolu ilə keçən xəstəliklər də daha çox yayılır. 
Mövzunun
aktuallığını nəzərə alaraq Sumqayıtın baş infeksionisti Sehri Babayevlə əlaqə
saxladıq. Həkim, Xeberle.com-a açıqlamasında söylədi ki, əhali bu haqda
marifləndirilməlidir. S.Babayev ağırlaşmaların daha çox böyüklər arasında
müşahidə olunduğunu bildirdi: "Mövsümlə bağlı xəstəliklər artmaqdadır. Son
günlər şəhərdə burun axması, boğaz ağrısı, halsızlıq və hərarətin yüksəlməsi
ilə müşayiət olunan virus epidemiyası yayılsa da, say ötən illərə nisbətən azdır. Lakin bu,
mövsümü xəstəlikdir, epidemiya deyil".
Sehri Babayevin
sözlərinə görə, xəstəlik qripə bənzəsə də, qrip virusu deyil: "Boğaz
qıcıqlanması, öskürək və hərarətlə müşayiət olunan virus vaxtında yardım
edilmədikdə böyüklər arasında ağırlaşmalara yol aça bilər. Bu ağırlaşmalara
ürək, böyrək, ağ yel xəstəliyi və sair
olan insanlarda daha çox rast gəlinir, azyaşlılar da isə virus ambulator
şəraitdə müalicə oluna biləcək həddə müşahidə olunur. Çox az halda körpələr
arasında sinusidə (qulaq ağrıları), və pnevmoniyaya, nadir hallarda isə
miningitə yol aça bilir".
Baş infeksionist
valideynlərə xəbərdarlıq da edib: "Uşaqlarda az halda istilik, halsızlıq
hiss edən valideynlər çalışsınlar ki, sahə həkiminə xəbər verərək övladlarını
məktəbə, yaxud da bağçaya göndərməsinlər,
çünki bu, digər uşaqların da virusa yoluxmaq ehtimalını artıran
səbəblərdəndir".
Pediatr Anar
Məmmədov isə Xeberle.com-a açıqlamasında qeyd etdi ki, mövsümü xəstəliklərin
yayılmasında immun sistemin zəifləməsidə əsas risk faktorlarındadır:
"Payız qış mövsümündə daha çox immunitet zəifləyir, orqanizmin
xəstəliklərə, viruslara qarşı müqaviməti azalmış olur. Zəifləmiş orqanizmi
viruslara və bakteriyalara qarşı qorumaq lazımdır. Bunun üçün öncə istər
böyüklər, istərsə də azyaşlılar gigiyenik qaydalara əməl etməlidir! Gözlə,
burunla əl təmasından mümkün olduğu qədər az istifadə etmək lazımdır, çünki ən
azından infeksiya varsa, əl təması ilə öz orqanlarına və yaxud da
ətrafındakılara da virusu yoluxdurmaq
riski artmış olur".
Pediatr virusdan qorunmaq üçün bəzi məsləhətlər də
verdi: "Vacib deyil ki, uşaqların əynini çox isti geyindirə, onların
ağız-burnunu bağlayasınız. Yaxşı olar ki, belə etməyəsiniz. Bu, usağı
qorumur, əksinə, zəiflədir. Uşaqları insanların sıx toplaşdığı məkanlara
aparmamaq məsləhətdir.
Otaqların havasını
tez-tez dəyişdırın, təmiz havada çox zaman keçirin, mayedən və təbii şirələrdən
çox istifadə edin. Uşaqların qida rasionunda vitaminli qidalara üstünlük verin,
bol meyvə-tərəvəz qəbul etməlidirlər".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
