Bir neçə gün əvvəl Məkkədəki "Məscid əl Həram”da qaldırıcı kranın aşması nəticəsində yaranan təhlükə zamanı olduqca maraqlı və həm də düşündürücü, təsirli anlar yaşanıb. 

"A24.az” xəbər verir ki, hadisə zamanı kiçik yaşlı uşaq təhlükəni hiss edir və dərhal anasını kənara itələyir. Nəticədə uşaq dağıntılar altında qalaraq dünyasını dəyişir, ana isə salamat qalır. Başqa sözlə, azyaşlı uşaq anası üçün ölümə belə gedir. Bu zaman ayağa qalxıb geri, uşağına tərəf qaçan ana isə hər şeyin gec olduğunun şahidi olur, çünki artıq balası dünyasını dəyişmişdi. Bu kadrlar ana-övlad məhəbbətinin əvəzsiz olduğunu bir daha ortaya qoyur. Amma təəssüflər ki, həyatda hələ də belə bir ülvi hisslərdən məhrum insanlar da az deyil. Bu qəbildən olan valideynlər övladını ya küçələrə atır, ya da ən yaxşı halda uşaq evlərinə verir. Digər tərəfdən isə, bəzi övladlar hələ də valideynlərini küçələrə və ya qocalar evinə atmaqdan belə çəkinmirlər. Odur ki, videomaterialdakı görüntülər qəlbində valideyn və ya övlad sevgisi olmayanlar üçün əsl nümunədir.

Xatırladaq ki, sözügedən hadisə nəticəsində yüzlərlə insan həlak olub və ya yaralanıb.