Türkiyənin Əskişəhər şəhərində həkimlərin səhlənkarlığı ölkədə geniş rezonas yaradıb. 2010-cu ildə bir qadını əməliyyat edən cərrahların, xəstənin qarnında unutduğu əməliyyat aləti 5 il sonra rentgen müayinəsi ilə üzə çıxıb. 

4 övlad anası olan  Xanım Özgül xərçəng xəstəliyi ilə mübarizə apardığından, cərrahlar təhlükəli hüceyrələrin bədəndən kəsilərək çıxarılmasına qərar verib.  Qadının bətnində aparılan əməliyyat uğurlu keçsə də, onun fəsadları  5 il sonra məlum olub. Sən demə həkimlər, damar tutmaq üçün istifadə olunan aləti, əməliyyatın sonunda qadının qarnından çıxarmağı unudub. Əməliyyatdan sonra yaralaları sağalan 67 yaşlı qadın evə buraxılıb və o 5 il qarnındakı metal alətlə yaşayıb. 

Qarın nahisəsində yenidən ağrılar hiss edən qadın rentgen müayinəsindən keçəndə, nə o gözlərinə inana bilib, nə də həkimlər. Onun qarın boşluğunda tibbi alətin olduğunu görən cərrahlar Xanım Özgülü yenidən əməliyyat edərək metal əşyanı çıxarıblar. 

Cərrahlar səhvlərini 5 il sonra düzəltsələr də, zərərçəkənin ailəsi xəstəxananı məhkəməyə verib.  Həkimlərin günahı sübuta yetirilsə, onda xəstəxana rəhbərliyi Özgül ailəsinə təzminat ödəmək məcburiyyətində qalacaq.