Bura gözəlliklər, güllər şəhərimiz, sevimli Sumqayıtımızdır. Təmizliyi, səliqə-sahmanı, yaşıllığı ilə seçilən, təbiətinin füsunkarlığı, havasının saflığı, insanlarının mehribanlığı ilə diqqət çəkən məkanımız. Gözlərimiz önündə gündən-günə dəyişən, yeniləşən, abadlaşan, işıqlı, nurlu şəhərimiz. Bu valehediciliyin, cazibəliyin qarşısında sözlərimiz acizdir, heyrətdən susuruq. Hara getsək sevgi, bəxtəvərlik siması gözəl güllər, çiçəklər görürük. Onlara baxdıqca insanın könlü gülür. Özlüyündə qeyri-ixtiyari "Ən xoşbəxt olduğum yerdir bura”, - pıçıldaşırsan. Sumqayıtımızın gənclik eşqiylə, bahar təravətiylə öpülən yollarını addımladıqca heranedici gül ətri paylanır ətrafımıza.
Bəli, şəhərimiz güllər şəhərinə çevrilib. Hər tərəf al-əlvandır. Sanki rəssamın fırçası ən gözəl rəngləri seçib bu yerləri boyayıb. Təzə-tər, rəngarəng güllər, yaşıl otların arasından boylanan çiçəklər hər kəsin zövqünü oxşayır. Bu gözəlliklərə baxdıqca doymaq olmur. Güllər heyrətamiz, sevimli mənzərə yaradır. Mərkəzi küçələrdə, parklarda, istirahət məkanlarında bu zəriflik nümunələri şəhər sakinlərinin, bura gələn qonaqların könlünü oxşayır.
Dünyanı həm də çiçəklər xilas edəcək. Bəli, çiçəklər, güllər Sumqayıtımızı gözəlləşdirir, ətrafa xoş rayihə bəxş edir. Belə xariqənin yaranmasına sevinirsən. Bir yandan ana təbiət, bir yandan insan əlləri gülüstan şəhərimizə sığal çəkir. Dəniz mehli, həyat eşqli musiqi dinləyirsən güllərin, çiçəklərin əhatəsində. Mükəmməl istirahət yeridir tükənməyən arzusu, kamı olan Sumqayıtım.
Bir sözlə, bu gözəlliklərin təməlində isə doğma şəhərimizə, Vətənimizə, torpağımıza olan sevgimiz, məhəbbətimiz dayanır.
İlhamə Məhəmmədqızı
Xəbərdən istifadə edərkən istinad etmək vacibdir.
