Bələdiyyənin ərazisində daimi yaşayan və eyni zamanda ən azı beş il müddətində yaşayış yeri üzrə qeydiyyatda olan Azərbaycan Respublikasının vətəndaşları tikinti obyektinin istismara hazırlığı barədə müvafiq icra hakimiyyəti orqanından müsbət rəy aldığı təqdirdə, həmin obyektin yerləşdiyi torpaq sahəsi fiziki və hüquqi şəxslərin mülkiyyətinə satıla və ya icarəsinə verilə biləcək.
Xeberle.com məlumat verir ki, Milli Məclisin ötən gün keçirilən iclasında müzakirəyə çıxarılan "Bələdiyyə torpaqlarının idarə edilməsi haqqında” qanuna təklif edilən dəyişiklikdə əksini tapıb.
Layihəyə əsasən, həmin şəxslər torpaq üzərindəki mülkiyyət və icarə hüquqlarını əldə etmək üçün açıq torpaq hərracları və ya müsabiqələrdə iştirak etmirlər.
Mövcud qanunvericiliyin tələblərinə görə hazırda bələdiyyə torpaqları üzərində mülkiyyət və icarə hüquqları, müəyyən istisnalar olmaqla, yalnız açıq torpaq hərracları və ya müsabiqələri vasitəsilə əldə edilə bilər.
Qeyd edilib ki, qəbul ediləcəyi təqdirdə tətbiq ediləcək qayda humanizm prinsipinə əsaslanır, tikinti obyektinin yerləşdiyi torpaq üzərində mülkiyyət və icarə hüquqlarının daha asan formada əldə olunmasına hüquqi əsas verəcək.
Müzakirələrdən sonra qanun layihəsi səsverməyə çıxarılaraq üçüncü oxunuşda qəbul edilib.
Hüquqşünas Ramil Süleymanov Xeberle.com-a yeni qəbul olunmuş qanun layihəsini təfsir edərək bildirib ki, buna qədər bələdiyyə torpaqları birbaşa satıla bilmirdi. Satış yalnız hərrac yolu ilə aparılırdı, həmçinin icarəyə də hərrac yolu ilə verilirdi. Sonuncu dəyişikliklərə əsasən isə, bələdiyyə tərəfindən icarəyə götürülən torpaqlarda tikilən qeyri yaşayış binaları dövlət tərəfindən istismara qəbul olunarsa və bununla əlaqəli müsbət rəy verilən zaman vətəndaşın birbaşa hərrac keçirilmədən həmin torpağı öz mülkiyyətinə qəbul etməsi üçün imkan yaranır. Lakin bu zaman ən vacib məqam vətəndaşın həmin tikilidə 5 il fasiləsiz yaşaması və ünvanda qeydiyyatda olması tələbidir. Əvvəl belə deyildi, mütləq vətəndaş əlavə pul ödəyib, hərrac yolu ilə mülkiyyət sahibi ola bilərdi. Həmçinin hərracda digər iştirak edən şəxslərin də olması, məsələni qəlizləşdirirdi. Lakin yeni qəbul edilən dəyişikliyə əsasən torpaq birbaşa vətəndaşın özünə satılacaq.
Xəbərdən istifadə edərkən istinad etmək vacibdir.
