Sumqayıt şəhəri, İnşaatçılar qəsəbəsi, İlyas Əfəndiyev küçəsində yol infrastruktu bərbad vəziyyətdədir.
Xeberle.com xəbər verir ki, bu barədə Bakıvaxtı.az-a şikayətində Sumqayıt şəhər sakini İmran Qurbanov deyib.
Şikayətçinin sözlərinə görə, yollar asfaltlanmadığı üçün hərəkət çətinləşir: "Yol elə bərbad vəziyyətdədir ki, nə maşınla hərəkət etmək olur, nə də piyada. Dəfələrlə şikayət etmişik, ammə nə fayda?! Baxan yoxdur ki yoxdur. Özü də bu yol Sumqayıtda böyük iş yerlərinə yaxındır. Hər gün nə qədər adam burdan işə, məktəbə gedib-gəlir”.
"İndi yaydır deyə bu yol qurudur. Bir azdan yağış yağanda, qar tökəndə bu yollar keçilməz hala düşəcək. Kanalizasiya daşır, palçıq dizdən olur, iydən dayanmaq olmur”.
İ.Qurbanov sakinlərin şikayətinə göstərilən laqeydliyi anlamadığını qeyd edib: "Şəhərin çölünü bəzəməklə deyil, arada bir içərilərə də, ən azından, göz gəzdirmək lazımdır. Biz əziyyət çəkirik, qışa qədər bu yolun düzəldilməsini xahiş və tələb edirik”.
Bakıvaxtı.az məsələ ilə bağlı Sumqayıt şəhər İcra Hakimiyyirinə sorğu göndərib.
Sorğumuza cavab olaraq Sumqayıt ŞİH-in mətbuat Katibi Eyvaz Qocayev bildirib ki, Sumqayıt şəhərində yol infrastrukturunun inkişafı ilə bağlı davamlı olaraq tədbirlər həyata keçirilir. Qeyd olunub ki, şəhərdaxili və ətraf yaşayış massivlərində yollar mərhələli şəkildə asfaltlanır.
"Sizin qeyd etdiyiniz ərazilərdə də gələcəkdə asfaltlanma işlərinin həyata keçirilməsi nəzərdə tutulub", - deyə Sumqayıt şəhər İcra Hakimiyyətindən bildirilib.