Dəfələrlə Sumqayıtın bir sıra mühüm ərazilərində səki infrastrukturunun olmaması problemini işıqlandırmışıq. Şəhərin bəzi mövcud səkilərində isə nəinki əlilliyi olan şəxslərin, heç sağlam sakinlərin belə hərəkət etməsi üçün imkan yoxdur. Kələ-kötür, yarımçıq, zəbt olunmuş səkilərin nəticəsində insanlar avtomobil yolları ilə hərəkət etmək məcburiyyətində qalaraq öz həyatlarını təhlükəyə atırlar.
Növbəti belə səki problemi şəhərin ən böyük mikrorayonu - şərti olaraq yeni və köhnə 9-cu mkr. hissələrini ayıran yoldadır. Üzeyir Hacıbəyov küçəsindən ("Araz" marketin arxası) Lüdviqshafen parkına gedən səkisiz avtomobil yolundan hər gün minlərlə sakin istifadə edərək həyatlarını təhlükəyə atır. Nəzərə alsaq ki, bu yolla piyada həm də şəhərin yeganə ali təhsil ocağı - Sumqayıt Dövlət Universitetinə yüzlərlə şagird və müəllim heyəti gedir, onda problemin aktuallığına hər hansı şübhə qalmır.
Məsələ ilə bağlı
Xeberle.com-a Sumqayıt şəhər İcra Hakimiyyətinin mətbuat xidmətinin rəhbəri Eyvaz Qocayev konkret deyil, ümumi şablon cavab verib.
E.Qocayev qeyd edib ki, Sumqayıt şəhərində yol infrastrukturunun inkişafı ilə bağlı tədbirlər planı var.
"Tədbirlər planına uyğun olaraq mərhələli şəkildə şəhərin bütün ərazilərində asfaltlanma işləri və səkilərin təmiri həyata keçirilir. Şəhər ərazisində piyadaların rahat və təhlükəsiz hərəkətini təmin etmək məqsədi ilə mövcud səkilər təmir olunur və yeni səkilər salınır", - deyə o vurğulayıb.
Mətbuat rəhbəri bildirib ki, ötən il Sumqayıt şəhər ərazisində Koroğlu və Sülh prospektlərində, Polad Həşimov, Nizami, Bakı, Nəriman Nərimanov, Babək, Cəfər Cabbarlı, Cəlil Məmmədquluzadə, Səməd Vurğun və digər ərazilərdə səkilər təmir olunub, bu il isə Koroğlu və Azərbaycan prospektində, Zülfü Hacıyev, Üzeyir Hacıbəyov, Ağa Quliyev, Niyazi, Bədəlbəyli, 20 yanvar, Zamin Hüseynov, Ərşad Kərimov, Kamran Hüseynov, Mehdi Hüseynzadə küçələrində, eləcə də bəzi mikrorayonların daxilində səkilərin təmir olunması nəzərdə tutulub.
Aygün İsmayılova
