Sumqayıt şəhərində "Mero yolu” kimi tanınan Ocaq küçəsinin işıqlandırılmaması gecələr burada avtomobillər və piyadaların hərəkəti çətinləşir.
Bu barədə "Report”un yerli bürosuna sakinlər məlumat veriblər.
Onların sözlərinə görə, yağış yağanda vəziyyət daha da pisləşir və işıqlandırılmayan yolda gecə saatlarında tez-tez qəzalar olur.
Ərazidə yaşayanlar yolboyu heç vaxt işıqlandırılma sisteminin olmadığını bildiriblər. Buna görə də onlar gecə vaxtı yolun kənarı ilə hərəkət etməyin belə əsl problemə çevrildiyini deyiblər.
Sürücülərin sözlərinə görə, işıqlandırılma olmadığı üçün gecə saatlarında piyadaları görmək mümkün olmur. Qarşıdan gələn avtomobillərin işığı isə təhlükəni daha da artırır.
Həm sürücülər, həm də sakinlər bildiriblər ki, yol tez bir zamanda işıqlandırılsa problemlər də aradan qaldırılmış olar.
Sumqayıt Şəhər İcra Hakimiyyətindən "Report”un yerli bürosuna verilən məlumata görə, son illər şəhərdə müasir işıqlandırma sistemlərinin quraşdırılması ilə bağlı genişmiqyaslı tədbirlər həyata keçirilir.
Qeyd edilib ki, şəhərdaxilində küçə və prospektlərdə işıqlandırma sistemləri tamamilə yenidən qurulub.
"Eyni zamanda şəhərətrafı yaşayış massivlərində də bu istiqamətdə müəyyən işlər görülüb və bu işlərin davam etdirilməsi üçün tədbirlər planı mövcuddur. Tədbirlər planında qeyd olunan ərazinin də işıqlandırma sistemlərinin yenidən qurulması nəzərdə tutulub", - məlumatda vurğulanıb.
Xəbərdən istifadə edərkən istinad etmək vacibdir.
