44 günlük Vətən müharibəsində şücaəti ilə "Pələng” ləqəbini qazanan, ağır döyüşlər zamanı Şəhidlik Zirvəsinə ucalan, 6 sentyabr 2020-ci il tarixdə Sumqayıt Şəhidlər Xiyabanında dəfn olunan gizir Qəzənfər Mütəllimovun iki qız övladı bizlərə əmanətdir...

---------------------------------------------------------------------------------------------

Qısa arayış: QƏZƏNFƏR ƏDALƏT oğlu MÜTƏLLİMOV 27 yanvar 1992-ci ildə Sumqayıt şəhərində dünyaya gəlib. 1999-2008-ci illərdə Sumqayıt şəhər 6 saylı tam orta məktəbdə, 2008-2011-ci illərdə Abşeron rayon Ceyranbatan qəsəbəsindəki 147 saylı Peşə Liseyində təhsil alıb.

Q.Mütəllimov 2011-2012-ci illərdə Naftalan şəhərində yerləşən "N” saylı hərbi hissədə müddətli həqiqi hərbi xidmətdə olub. 2013-cü ilin yanvar ayından aprel ayınadək Müdafiə Nazirliyinin "Təlim-Tədris Mərkəzi”ndə MAHHXHQ kursunun dinləyicisi olub və kursu "Manqa komandiri” ixtisası üzrə bitirib.

M.Qəzənfər 2013-cü ilin aprel ayından 2015-ci ilin dekabr ayına qədər Abşeron rayonunun Pirəkəşkül qəsəbəsindəki "N” saylı hərbi hissədə manqa komandiri vəzifəsində xid­­­mət edib. 2015-ci ilin yanvar-mart aylarında Xızı rayonunun Yaşma qəsəbəsində yerləşən "N” saylı hərbi hissədə Xüsusi Təyinatlı Taborun "Xüsusi təyinatlı qrup”unun kəşfiyyatçısı, 2015-ci ilin mart ayından 2018-ci ilin dekabr ayınadək Cəlilabad rayonundakı hərbi hissədə kəş­­fiy­yatçı, 2018-ci ilin dekabr ayından isə "N” saylı hərbi hissədə "Maddi-texniki təminat” bölüyünün "Təmir” ta­qı­mın­da manqa komandiri vəzifəsində çalışıb.

Q.Mütəllimov 2016-cı ildə baş verən Şanlı Aprel döyüşlərində Talış kəndi istiqamətində gedən ağır döyüşlərdə iştirak edib.

­2020-ci ilin fevral ayında Qəzənfər Mütəllimov Müdafiə Nazirliyinin TTM-də "Gizir” kursunun dinləyicisi olub.

Q.Mütəllimov44 günlük Vətən müharibəsində Füzuli-Cəbrayıl istiqamətində gedən döyüşlərdə iştirak edib, düşmənə qarşı savaşda qəhrəmancasına həlak olub.

-------------------------

2011-ci ildə liseyi bitirən Qəzənfərin sonuncu imtahanı məhz aprel ayının 25-də - Səfərbərlik və Hərbi Xidmətə Çağırış üzrə Dövlət Xidmətinin Sumqayıt İdarəsi tərəfindən həqiqi hərbi xidmətə çağrıldığı günlə üst-üstə düşür. Bu səbəbdən onun başqa tarixdə xidmətə aparılmasına qərar verilir. Lakin aprelin 25-i səhər saatlarında sonuncu imtahanını verən Qəzənfər, heç kimə bir söz demədən, birbaşa Hərbi Komissarlığa gedərək, könüllü ərizə yazır. Və həmin günün axşamı Vətən qarşısında borcunu yerinə yetirmək üçün hər­bi xidmətə yola düşür.

Qəzənfər Mütəllimov hərbi hissədə müddətli həqiqi hərbi xidmətini ləyaqətlə yerinə yetirir, heyət nəfəri və manqa komandiri vəzifəsində çalışaraq, xdmətini uğurla başa vurur. O, 2012-ci ilin oktyabr ayında ehtiyata bu­­­raxılır.

Qəzənfər hərbçi olmaq arzusu ilə Müdafiə Nazirliyinə müraciət edir. Razılıq alan gəcin sevinci yerə-göyə sığmır...

Gənc hərbçi 2016-cı ildə Aprel döyüşlərində iştirak edərək, Talış kəndi istiqamətində gedən döyüşlərdə düşmənə layiqli cavab verir.Döyüşlər uğurla bitdikdən sonra Qəzənfərdən xəbər çıxmır. Hərbi hissədə hamı onun şəhid olduğunu zənn edir. Müharibədə "Dur” əmri verilsə də, o, döyüş yoldaşı ilə mühasirədə olub. Üç gün keçdikdən sonra, Qə­zən­fər və onunla bərabər olan dörd hərbçi yoldaşları, hər birinin də kürəyində bir yaralı olmaqla, mühasirəni yararaq geri dönürlər.

Aprel döyüşlərində ən yaxın silahdaşlarının itkisi Qəzənfəri çox sarsıdır. Pəncəli Teymurov, Emin Bağırov gözünün qabağında şəhid olurlar. Raquf Orucovun nəşini döyüş meydanından çıxaran Qəzənfər bu itkilərlə barışa bilmirdi. O, nə olursa-olsun, silahdaşlarının intiqamını alacağına söz verir...

Şanlı Aprel hadisələrindən sag-salamat qayıdan Qəzənfər Mütəllimiov yenidən gündəlik hərbçi həyatına davam edir. Ailə qurmaq, oğul-uşaq sahibi olmaq arzusu ilə o, 2018-ci ildə Zöhrə xanımla nişanlanır, daha sonra isə ailə həyatı qurur. Bu nikahdan onların bir qız övladları dünyaya gəlir, adını "Mələk” qoyurlar. Ana-bacıları və sevimli ailəsi ilə Qəzənfər sağlam, xoşbəxt həyatını yaşayır. Bununla belə, qəlbinin dərinliyində kök salmış bir hiss – mənfur düşmənə qarşı QİSAS hissi ona rahatlıq vermir. Bu barədə əziz-doğmalarına bir söz deməyərək, QİSAS gününü səbirsizliklə gözləyir...

Qəzənfər təbiətən mehriban, səmimi, gülərüz, hər kəsə qarşı diqqətcil və qayğıkeş, köməyə ehtiyacı olana, darda olana anındaca əl uzadan, qəlbi, vicdanı təmiz, hər işində məsuliyyətli, doğrucul, haqq-ədalət, dost yolunda ölümə belə getməyə hazır olan, güclü iradəyə və xarakterə malik Vətən oğlu idi. Elə saya gəlməz gözəl keyfiyyətlərinə görə hamı onu sevir, ona etibar edir, güvənirdi.

Ana-bacısına, ailəsinə həddən çox bağlı olan Qəzənfər bacılarına hər zaman deyərdi: "Anamız bizi min bir əziyyətlə böyüdüb, onun əziyyətinin haqqını heç vaxt heç nə ilə qaytara bilmərik”.

2020-ci ilin fevral ayında Müdafiə Nazirliyinin "Təlim-Tədris Mərkəzi”ndə "Gizir” kursunu uğurla bitirdikdən sonra Q.Mütəllimov yeni rütbəsi ilə hərbi fəaliyyətinə davam edir.

Q.Mütəllimov hərbidə 8 illik xidməti dövründə bir çox xarici ölkələrdə təlimlərdə iştirak etmiş və kurslar keçmişdir. Əməyi yüksək qiymətləndirilərək, 26.06.2013-cü ildə "Azərbaycan Silahlı Qüvvələrinin 95 illiyi” və 26.06.2018-ci ildə "Azərbaycan Ordusunun 100 illiyi” Yubiley medalları, bir çox Diplom, Fəxri Fərman və Sertifikatlarla təltif olunmuşdu.

2020-ci il sentyabr ayının 27-də Ali Baş Komandanın əmri ilə düşmənə qarşı əks-hücüm əməliyyatının başlanması gənc zabiti də sevindirir. O, bu günün həsrəti ilə yaşamışdı.

Q.Mütəllimov Azərbaycan Ordusunun müzəffər əsgər və zabitləri kimi, II Qarabağ müharibəsində şərəfli döyüş yolu keçir, xalqımızın başına illərlə müsibətlər açan mənfur qonşuların layiqli cavabının verilməsində döyüş meydanında misilsiz şücaət göstərir. O, Füzuli-Cəbrayıl istiqamətində gedən ağır döyüşlərdə iştirak edir. Doyüşçüləri ərzaqla, yeri gələndə silah-sursatla təmin etməklə yanaşı, qanlı döyüşlərdə silahını əlinə alıb igidcəsinə savaşır, yüzlərlə yaralını, şəhidlərimizi döyüş meydanından çıxarır.

Hər dəfə ölümlə üz-üzə gələn igidimiz gördüyü mənzərədən, silahdaşlarının itkisindən nə qədər sarsılsa da, çox yaxşı bilirdi ki, müharibə itkisiz ötüşmür. Və hər dəfə də özünə yalnız şərəfli ölümün sahibi olmağı arzulayır. Bu şərəfli ölüm isə ŞƏHİDLİK idi!

Göstərdiyi sayagəlməz şücaətlərinə görə artıq düşmən də Qəzənfəri yaxşı tanıyır, onu məhv etmək üçün dəridən-qabıqdan çıxırdı. İstəyinə çatmayan düşmən hirsindən qovrulurdu...

Bir dəfə belə bir hadisə olur: Qəzənfər və yoldaşları tapşırıqla kəş­fiy­ya­ta gedirlər. Yolda qarşılarına ermənilərin hərbi maşını çıxır. Ermənilər Qəzənfərgilin azərbaycanlı olduqlarını an­la­mırlar, buna baxmayaraq maşını saxlayırlar. İgidlərimiz düşməni məhv edib, onların maşınını ələ keçirirlər və erməni postuna daxil olurlar. Post komandiri elə bilir ki, gələn ermənilərdir və onların qarşısında vəziyyət barədə raport ve­rir. Qəzənfər tapançasını çıxarıb, düşmənin ağzının içindən vurur. Sonra isə əsgərlərimiz düşməni tamamilə məhv edir­lər.

Döyüşlərdə göstərdiyi igidliyə görə dəfələrlə düşmənin əsas hədəfinə çevrilən Qəzənfərin hətta bir dəfə idarə etdiyi ma­şın partladılır. Hər kəs onun şəhid olduğunu zənn etsə də, o, çeviklik göstərərəkpartlayışdan öncə maşından tullanmağı bacarır. Bu şücaətinə görə, döyüş yoldaşları ona "Pələng” ləqəbi verirlər.

Oktyabrın 2-si 2020-ci ildə Qəzənfərgil yaralıları geri – təhlükəsiz yerə daşıyanda düşmən minamyotla maşını atəşə tutur və bir tərəfini sıradan çıxardır. Qəzənfər içi yaralı döyüş yol­daşları olan maşını üç təkərlə idarə edərək, böyük bir hünər göstərməklə, döyüş yerindən uzaqlaşmağa nail olur.

Cəsur döyüşçünün hər zaman bir sözü olub: "Döyüş yoldaşım mənim qardaşımdır. Mən yaralı və ya şəhid olsam, məni də döyüşdən yoldaşım olan qardaşım çıxaracaq”.

Qəzənfərin şücaəti erməniləri vəlvələyə saldığından, "başına” pul mükafatı qoymuşdular ki, öldürülsün. Düşmənin iki dəfə ciddi cəhdinə baxmayaraq, bu, alınmır. Lakin üçüncü dəfə ermənilər Qəzənfəri və 7 nəfər silahdaşını pus­quya salmağa nail olurlar.

Oktyabrın 4-də axşam saatlarında Qəzənfər evlərinə zəng edir. Ana oğlunun səsindəki yorğunluğu, halsızlığı hiss edir. Qəzənfər ön cəbhədən yenicə gəldiklərini, bir tərəfdən də yağışın yağdığını, bir qədər yorğun olduğunu bildirir. Həssas ana ürəyi nə qədər narahat olsa da, oğluna bir söz demir, sadəcə özündən muğayat olmağı, özünü qorumağı tapşırır...

2020-ci il oktyabrın 4-dən 5-nə keçən gecə saat 4 radələrində yeni bir tapşırıq gəlir: təcili olaraq önə təminat getməlidir. Cətin hava şəraiti olsa da, nə olur-olsun önə təminat çatdırılmalı idi! Qəzənfər bir an belə tərəddüd etmədən bildirir ki, "mən gedərəm!”. Dediyi kimi də edir.

Həmin gün güclü yağış yağırdı. Yollar palçıq idi. Qəzənfər və onun 7 döyüş yoldaşı; 3 gizir və 5 əsgər olmaqla, sübhçağı 2 maşın yola düşürlər. Yollarının üstündə pusqu quran ermənilərlə qızğın döyüş gedir. İgidlərimiz son damla qanlarınacan rəşadətlə savaşırlar. Lakin...

Azərbaycanın igid oğulları, Qəzənfər Mütəllimov da daxil olmaqla, üzbəüz qanlı savaşda şəhid olaraq, Allah dərgahında ən uca məqama – Şəhidlik Zirvəsinə ucalırlar!

Qəzənfər ən çətin anlarda belə, zarafatından qalmaz, döyüş yoldaşlarında şən əhval-ruhiyyə yaradardı. Pozitiv, həyat dolu olun gənc, tezliklə Qələbənin çalınacağına inanır, həsrətlə o günü gözləyirdi...

Çox zaman elə düşmənin öz silahını özünə tuşlayan və bundan zövq alan Vətən oğlunun döyüş yoldaşları onun igidliyindən, qorxmazlığından və cəsurluğundan bu gün ağızdolusu danışırlar. "Hətta heç kimin bacar­madığı ağır tapşırıqları belə, Qəzənfər ürəklə yerinə yetirərdi” deyərək, qəhrəmanın döyüş tarixçəsinin məlum olmayan məqamlarını açıqlayırlar.

Qəzənfərin itkisinə dözməyən Minəxanım ana bir müddət sonra bu fani dünyadan oğul həsrəti ilə köçdü...

Oktyabrın 6-sı 2020-ci ildə Azərbaycan Ordusunun giziri, 28 yaşında adını Azərbaycanın Yeni Tarixinin silinməz səhifələrinə Qızıl hərflərlə yazan, igidliyinə və şücaətinə görə, yoldaşları tərəfindən "pələng” ləqəbi verilən cəsur döyüşçü Qəzənfər Mütəllimov Sumqayıt Şəhidlər Xiyabanında torpağa tapşırılır.

Qəhrəmanımızın özündən sonra qızı Mələk, şəhidliyindən sonra, 2021-ci il mart ayının 30-dan 31-nə keçən gecə dünyaya gələn digər qız övladı – Nişanə bizə əmanətdilər. Nəvəsi dünyaya gələn gün Minaxanım ana birbaşa Şəhidlər Xiyabanına getmiş və oğlunun məzarı önündə demişdi: "Nişanə olan qızın dünyaya gəldi. Gözün arxada qalmasın, oğul!”.

Olsun ki, göylərdən bizlərə boyanan Ananın ruhu artıq rahatdır, oğluna qovuşduğuna görə...

Azərbaycan Silahlı Qüvvələrinin qeyrətli, məğrur, mətin oğlu – gizir Qəzənfər Ədalət oğlu Mütəllimov ölümündən sonra, Ölkə Rəhbərinin müvafiq Sərəncamlarına əsasən, "Vətən uğrunda” və "Cəbrayılın azad olunmasına görə” medalı ilə təltif edilib. Həmçinin mətin hərbçi Prezidentin 24.06.2021-ci il tarixli Sərəncamı ilə "İgidliyə görə” medalı, 05.11.2021-ci il tarixli Sərəcamla isə "Azərbaycan Bayrağı” ordeni ilə təltif olunub.