...Valideynlərin ağlına da belə gəlməzdi ki, bir gün bu sakit təbiətli oğul öz şücaəti ilə Allah dərgahında ən uca məqama yüksələcək...

(Əsgər)       

Qısa arayış: ƏBİL QADİR oğlu CƏBİZADƏ 26 fevral 1993-cü ildə Sumqayıt şəhərinin Corat qəsəbəsində dünyaya göz açıb. 2000-2011-ci illərdə Sumqayıt şəhər 7 saylı tam orta məktəbdə oxuyub. O, təhsillə yanaşı, növbəli şəkildə "Kimboks”, "Boks”, "Karate”, "Cüdo” idman növləri ilə məşğul olub. 

Ə.Cəbizadə orta təhsilini müvəffəqiyyətlə başa vurduqdan sonra sənədlərini ali məktəbə verib və 311 balla Azərbaycan Dövlət İqtisad Universitetinin Texnologiya və dizayn” fakültəsinə qəbul olub. 2015-ci ildə ali təhsil ocağını  "Çox işlənən malların texnologiya və dizaynı” ixtisası ilə bitirirb.

Öz ana dilinə ürəkdən bağlı olan C.Əbil bir neçə xarici dil də bilib.

Ə.Cəbizadə 2015-ci ilin oktyabr ayında Sumqayıt Şəhər Hərbi Komissarlığı tərəfindən həqiqi hərbi xidmətə çağrılıb. Səhhətindəki problemə baxmayaraq, Vətən qarşısındakı borcunu yerinə yetirmək üçün, böyük həvəslə hərbi xidmətə yola düşüb. Əvvəlcə Gəncə şəhərində,  Andiçmə mərasimindən sonra Mingəçevir şəhərində yerləşən "N” saylı hərbi hissələrdə xidmət edib.

C.Əbil xidməti zamanı komandirlər tərəfindən verilən döyüş tapşırıqlarını, idman normativlərini vaxtında, cəld, qüsursuz yerinə yetirdiyinə, fəallığına, bacarıq və qabiliyyətinə görə fərqlənib və zabit heyətinin rəğbətini qazanıb. Silahla mükəmməl davranışına görə, "Baş atıcı” vəzifəsinə təyin olunub.

2016-cı ildə baş verən Şanlı Aprel döyüşlərində iştirak edən C.Əbil göstərdiyi şücaətə, həmçinin xidməti dövründə nümunəvi davranışına görə, Fəxri Fərmanla təltif edilib.

2016-cı ilin oktyabr ayında hərbi xidmətini başa vurub evə dönən Ə.Cəbizadə 2020-ci ilin sentyabr ayınacan müxtəlif şirkətlərdə çalışıb. 2020-ci ilin sentyabr ayının 21-də "Hərbi vəzifə və hərbi xidmət haqqında səfərbərlik hazırlığı və səfərbərlik”lə bağlı, Vətən sevdalı oğul, Azərbaycan Respublikası Qanunlarına müvafiq olaraq, təlim və məşqlərə çağrılıb.

---------- 

Əbil Cəbizadə yaşının az olmasına baxmayaraq, geniş təxəyyülə və zəngin dünyağörüşünə malik  gənclərdən idi. İxtisasca iqtisadçı olduğuna görə, dünyada baş verən hadisələri, xarici siyasəti, iqtisadi durumu mütəmadi izləyib, politoloqların fikirlərini dinləyib və marağına səbəb olan məlumatı özlüyündə götür-qoy edib. ətrafındakı insanları hər zaman mehriban, gülərüz, şəm görmək istəyib. Uşaqlıqdan kitablara maraq göstərərək, tarixi və detektiv əsərləri mütaliə edib, döyüş dilmlərini izləyib. 

C.Əbil sağlam və güclü olsun deyə, hərbi xidmətdən qayıtdıqdan sonra da bir çox idman növləri ilə məşğul olub. Dəfələrlə mötəbər yarışlarda iştirak edərək gücünü sınayıb. 

AİLƏ: Cəbizadələr ailəsində ata gecə-gündüz işləyər, halal zəhməti ilə ailəsini dolandırar, ana ev qayğıları, uşaqların təlim-tərbiyəsi ilə məşğul olardı. Dolanışıq çətin olsa da, bu aildə iki oğlan uşağı vətənpərvər ruhda böyüyürdü. Əbil və Abbas təkcə qardaş deyil, bir-birilər iilə möhkəm dost, sirdaş idilər. 

Valideynlər səhhətləri ilə bağlı təqaüdə çıxdıqdan sonra

artıq böyümüş oğullar ailə qayğıları ilə yaşayırlar. 

____

Həyat, doğrudan da, qəribəliklər və təsadüflərlə doludur... Əbil Xocalı soyqırımından bir il sonra, 1993-cü il 26 fevral tarixində dünyaya gəlib. Bəlkə də, doğulduğu günün, tarixin onun gələcək həyatında müəyyən rolu olub, kim bilir... Əsası odur ki, vətənərvər ruhda böyüyən gənc oğlan Vətən üçün canından keçərək Şəhid olmaqdan qorxmayıb, çəkinməyib, əksinə, bunu özünə şərəf bilib.

Əbil doğulduğu tarixdə ad gününü qeyd etməyi ağlına belə gətirməzdi. Tarixin o günündə yaşananlarla barışmaz, qəlbində düşmənə qarşı nifrət hissi daha da

artardı. O qanlı gün gözləri önündə canlanar, körpə fidanların səsləri qulaqlarından çəkilməzdi. O da, digər vətənpərvər gəncər kimi, tezliklə müharibənin olmasını, illərin həsrətinə birdəfəlik son qoyulmasını, ən əsası isə, işğalçı ermənilərdən qisas alınacağı günü səbirsizliklə gözləyirdi.

Bəli, Əbilin intizarla gözlədiyi gün gəlib çatdı. Artıq günahsız insanların və şəhidlərimizin qisası və intiqamı zamanı idi. 21 Sentyabr 2020-ci ildə ölkədə səfərbərlik elan olunanda ön cəbhəyə yollananların arasında Azərbaycanın vətənpərvər oğlu Əbil Cəbizadə də var idi...

Altı günlük təlimlərdən sonra, 27 sentyabr 2020-ci il tarixdə, döyüş yoldaşları ilə birlikdə, Vətən müharibəsinə qoşulan Əbil Cəbizadə bir çox əməliyyatlarda iştirak edir. O, Tərtər, Füzuli, Cəbrayıl rayonlarının, xüsusilə də Xudafərin körpüsünün işğaldan azad olunması uğrunda gedən savaşda misilsiz şücaət göstərir. Hərbi xidmətdə Baş atıcı olan gənc əsgər düşmənlə mübarizədə bir an belə yorulmaq nə olduğunu bilmir. O, silahla davrana bilməyən əsgər yoldaşlarına silahdan necə düzgün istifadə etmək qaydalarını öyrədir, qızğın döyüşlər zamanı savaş meydanından yaralı yoldaşlarını çiynində daşıyır, təhlükəli ərazidən uzaqlaşdırır. Bu müddətdə neçə-neçə silahdaşını ölümün pəncəsindən xilas edir cəsur döyüşçü... 

Cəsur döyüşçü imkan tapan kimi ailəsi ilə əlaqə saxlayırdı. Vəziyyətin yaxşı olduğunu, döyüş yoldaşlarının  yüksək əhval-ruhiyyə ilə döyüşə atıldıqlarını, belə getsə, tezliklə Qələbə çalacaqlarını deyirdi.

...Dürdanə xanım da, bütün analar kimi, vaxtı çatanda oğlanlarını evləndirmək, nəvə-nəticə sahibi olmaq istəyirdi. Bu səbəbdən, hər dəfə Əbilə bu barədə söz açardı. Nəhayət, bir gün ana həqiqi hərbi xidmətdə olan oğlundan razılıqla bağlı mesaj alır: "Ana, dediklərini fikirləşdim, daha sizi gözlətmək istəmirəm. Yaxşı, razıyam. Əgər belə istəyirsənsə, onda mənə halal süd əmmiş qız tap, evlənim”. Ana da cavabında zarafatla demişdi ki, "evlənən sənsən yoxsa mən? Özün seç, evləndirim”.

Oğlunun razılığını almış ananın sevinci yerə göyə sığmamışdı. Sonradan baş verən hadisələr üzündən, Əbil evlənmək barədə düşünməyi ağlına da gətirməmişdi. Bircə fikri var idisə də, o da Vətən torpaqlarının azadlığı, bütövlüyü idi. Ananın arzuları bitib-tükənmirdi; tezliklə müharibə Qələbə ilə başa çatsın, igid oğlu sağ-salamat evinə dönsün, ona  toy eləsin, "Vağzalı” sədaları altında evinə gəlin gətirsin... 

Ana xoş arzularla yaşayaraq xəyallar qurmağında, mətin döyüşçü Əbil Cəbizadə isə Vətən torpaqlarının müdafiəsi uğrunda gedən qızğın döyüşlərdə düşmənə qarşı mərdliklə mübarizə aparmaqda idi...

Oktyabrın 12-də axşam saatlarında Əbilin ailəsinə son zəngi olur. Qardaşı ilə danışarkən özlərindən mugayat olmalarını, zəng etməsə nigaran qalmamalarını tapşırır və halallıq alır...

C.Abbas (qardaş): "Qardaşım oktyabrın 12-si zəng etdi. Dedi, "hər şey yaxşıdır. Burada sakitlikdir. O qədər rahat, arxayın danışdı ki, başına nəsə gələcəyi belə, ağlımıza gəlməzdi. Demə, bizim narahat olmağımızı istəməyib...”.

Oktyabrın 13-dən 14-nə keçən gecədən Füzuli-Cəbrayıl istiqamətində, düşmən tərəfindən işğal olunmuş kəndlərimizin azad olunması uğrunda qızğın döyüşlər başlayır.  

Düşmənlə mərdliklə döyüşən Əbil Cəbizadə 14 oktyabr 2020-ci ildə Füzuli-Xocavand istiqamətində, Əhmədbəyli, Zoğalbulaq kəndlərinin işağalçılardan azad olunmasında böyük şücaət göstərir. Bu döyüşdə igidimiz qəhrəmancasına həlak olaraq Allah dərgahında ən uca məqama - Şəhidlik Zirvəsinə ucalır.

Beləcə, bir igidin də arzu və planları yarımçıq qalır, bir ananın gözəl xəyalları çilik-çilik olur... Lakin Əbil kimi Vətən sevdalı gənclər az ömürlərinə böyük və şərəfli tarixi sığışdıra bilirlər. O tarix ki, vərəqlədikcə sirrli-sehirli bir dünyanın qonağı olursan... 

15 Oktyabr 2020-ci il tarixində Azərbaycanın qəhrəman oğlu Əbil Cəbizadə Sumqayıt Şəhidlər Xiyabanında dəfn olunur.

Qadir bəy (ata): "Sakit təbiətli, xeyirxah, nəcib, qəlbiyumşaq, ədəb-ərkanlı idi. Bir dəfə də olsa, üzümüzə ağ olmamışdı. Başqa cür olsaydı, bəlkə də bu qədər üzülməzdik. Qulağında ağıreşitmə problemi vardı. Anası əsgərlikdən saxlamaq istəyəndə demişdi ki, "mən getməyim, o getməsin, bəs kim gedib alsın bu torpaqları?!”. Elə birbaşa komissarlığa getmişdi. Çox mehriban, dostcanlı idi. Elə yola salanda da, dostları maşını Azərbaycan bayraqları ilə bəzəyib yola salmışdılar onu. Sevdiyi doğma bayrağına bürünərək də doğma ocağına döndü balam...”.

Vətənini, Torpağını, Bayrağını, Himnini hər zaman sevdi, hər kəsdən, hər şeydən üstün tutdu, "Vətənə canım fəda!” deyərək ölümü gözə aldı cəsur qəhrəman Əbil Cəbizadə!

Dürdanə xanım (ana): "Çox mərd, səxavətli idi balam. Bir tikəsi olsaydı belə, bölüşərdi. Mərhəmət çırağı idi. Son dəfə oğlumu görmək, ona sarılmaq, üzündəki qəlpə yaralarını duz kimi yalamaq nəsib oldu mənə. Buna da şükür.

Sözlə ifadə edilməyəcək qədər ağırdır onsuz... Amma yenə güclü olmağa çalışırıq. Oğlumun canını fəda etdiyi Torpağa, Vətənə bizim də canımız qurban! Əbil balamla qürur duyuruq. O, əməli ilə başımızı uca elədi. Sağ olsun!”.

Bu gün adını Zəfər tarixinin Şanlı səhifələrinə Qızıl hərflərlə yazan Əbil Cəbizadə ilə təkcə ailəsi, təhsil aldığı ocaqların pedaqoqları, sinif və tələbə yoldaşları, dostları, qohum-əqrəbaları deyil, bütün Azərbaycan xalqı fəxr edir, ruhuna dualar oxuyur... 

Azərbaycan Silahlı Qüvvələrinin cəsur, qorxmaz, igid əsgəri, 27 yaşlı Baş atıcı Əbil Qadir oğlu Cəbizadə göstərdiyi igidliyə görə ölümündən sonra, Ölkə Rəhbərinin müvafiq Sərancamlarına əsasən, "Vətən uğrunda”, "Cəbrayılın azad olunmasına görə” və Füzulinin azad olunmasına görə” medalları ilə təltif edilib.

Ruhun şad olsun, Cənnətməkan Şəhidimiz!!!