Havalar soyuyur, istilik sisteminə ehtiyac artıq hiss edilir. Sakinlər bildirirlər ki, hər il eyni problemi yaşayırlar. Problem digər regionlarda olduğu kimi, Sumqayıtdan da yan keçmir. Müvafiq qurumlar konkret tarixdə - 15 noyabrda qış rejiminə keçdikləri üçün havalar qəfil soyuyan zaman insanlar soyuqdan əziyyət çəkirlər.
Havaların soyuq keçdiyi günlərdə istilik sisteminin olmaması ilə bağlı xüsusilə də Sumqayıtda yaşayan sakinlər tərəfindən tez-tez şikayətlər olur.
Şəhərdə yaşayış binalarının müəyyən hissəsi istilik sisteminə qoşulsa da, yaşayış binalarının böyük qismi hələ də istilik sisteminə qoşulmayıb.
Görəsən, digər yaşayış binaları nə vaxt mərkəzi istilik sisteminə qoşulacaq? Ümumiyyətlə, növbədə hansı mikrorayonların binaları olacaq..?
Maraqlıdır ki, Sumqayıt şəhərində niyə illərdir bu işdə fasilə yaranıb..?
Suallarımızı "Azəristiliktəchizat" ASC-yə ünvanladıq. Qurumun mətbuat xidmətinin rəhbəri Elvin Basqallı Xeberle.com-a açıqlamasında deyib ki, Sumqayıtda hazırda 287 bina istiliklə təmin olunur: "Regionların İnkişafı Dövlət Proqramı çərçivəsində Sumqayıt şəhərinin 287 binasında bərpa olunub və istiliklə təmin olunur. Digər yaşayış binalarının istilik təchizatının bərpası əsaslı kapital qoyuluşu tələb edən infrastruktur layihələrdir və növbəti mərhələ investisiya proqramlarında nəzərdə tutulub".
Xəbərdən istifadə edərkən istinad etmək vacibdir.
