Saray qəsəbəsi ilə Sumqayıtı birləşdirən körpünün sütunlarında problemlər yaranıb. Körpünün altından həm su kanalı, həm də dəmiryolu xətti keçir. Sakinlər bildirir ki, körpünün yan tərəflərində dağılma müşahidə edilir.
Sürücülər Xeberle.com-a açıqlamasında bildirib ki, "Saray” körpüsü qəzalı vəziyyətdədir və onun üzərində çox sayda çatlar, nahamarlıqlar var. Bir müddət öncə isə yolun kənarında boşluq yaranıb. Mövcud vəziyyət yoldan istifadə edən sürücüləri də istər-istəməz narahat edir. Hər gün avtomobili ilə körpü üzərindən hərəkət edən Əli Məmmədov deyir ki, körpü normadan artıq yüklənir: "İşıqforun olması tıxacı daha da artırır. Nəticədə körpü yüklənir. Bəzən olur ki, vaxtımızın çox hissəsini körpünün üzərində tıxacda keçiririk. Onun üçün adiyyəti qurumların körpüyə baxış keçirməsi vacibdir”.
Sakinlər iddia edirlər ki, körpünün vəziyyəti ilə bağlı dəfələrlə müvafiq orqanlara müraciətlər etsələr də, hər hansı nəticə yoxdur.
Abşeronla Sumqayıtı birləşdirən Saray körpüsü üzərindən hər gün yüzlərlə avtomobil hərəkət edir. Çox vaxt sözügedən körpünün üzərində uzun tıxac da yaranır. Körpüdə hərəkət sıxlığının, əslində tıxacların yaranmasına əsas səbəbdən biri də quraşdırılmış işıqforlardır. Sumqayıta gedən avtomobillərin sayının çox olması körpünün sol zolağında ciddi tıxaclar yaradır.
Nəzərə alsaq ki, hər gün içi daşla dolu yük maşınlarının körpüdən keçməsi təhlükəni daha da yaxınlaşdırır. Körpünün bərkidilməsi üçün qabaqlayıcı tədbirlər görülməzsə, körpü hər an uça bilər.
Məsələ ilə əlaqədar "Azərbaycan Avtomobil Yolları” Dövlət Agentliyinin İctimaiyyətlə Əlaqələr şöbəsinin rəisi Anar Nəcəfli Xeberle.com-a bildirib ki, həmin ərazi balansımızda deyil: "Həmin ərazi bizim balansımızda deyil. Bununla bağlı hər hansısa məlumatım yoxdur”.
QEYD: Mövzunu davam etdirəcəyik.
Elşən Yəhyayev
Xəbərdən istifadə edərkən istinad etmək vacibdir.
