Xəbər verdiyimiz kimi, Saray qəsəbəsi ilə Sumqayıtı birləşdirən körpünün sütunlarında problemlər yaranıb. Körpünün altından həm su kanalı, həm də dəmiryol xətti keçir. Sakinlər bildirir ki, körpünün yan tərəflərində dağılma müşahidə edilir. Nəqliyyat ekspertləri hərəkəti tənzimləyən işıqforun yerinin dəyişdirilməsini təklif edir. Belə ki, qırmızı işıqda onlarla avtomobil körpünün üzərində dayanaraq onsuz da problemli sütunlara əlavə ağırlıq yaradır. Sürücülər də Xeberle.com-a açıqlamasında bildirib ki, "Saray” körpüsü qəzalı vəziyyətdədir və onun üzərində çox sayda çatlar, nahamarlıqlar var.
Məsələylə bağlı Sumqayıt şəhər İcra Hakimiyyəti ilə əlaqə saxladıq. İcra Hakimiyyətinin mətbuat xidmətinin rəhbəri Eyvaz Qocayev Xeberle.com-a açıqlamasında bildirib ki, körpüyə yerində baxış keçiriləcək: "Sumqayıt şəhər İcra Hakimiyyəti tərəfindən aidiyyəti qurumlara rəsmi müraciət ünvanlanıb. Körpüyə yerində baxış keçiriləcək və verilmiş rəy əsasında zəruri tədbirlər görüləcək”.
Qeyd edək ki, ötən yazımızda "Azərbaycan Avtomobil Yolları” Dövlət Agentliyi ilə əlaqə saxlamışdıq. Qurumun İctimaiyyətlə Əlaqələr şöbəsinin rəisi Anar Nəcəfli Xeberle.com-a bildirmişdi ki, həmin ərazi balanslarında deyil: "Həmin ərazi bizim balansımızda deyil. Bununla bağlı hər hansısa məlumatım yoxdur”.
Elşən Yəhyayev
Xəbərdən istifadə edərkən istinad etmək vacibdir.
