Xəbər verdiyimiz kimi, Sumqayıtda uzun illərdir ki, sakinləri narahat edən səki problemi hələ də qalmaqdadır. İnsanların daha çox hərəkət etdiyi ərazidə piyadalar üçün səkinin olmaması bu yolla gedən insanlar üçün təhlükə yaradır. Buna görə də sakinlər avtomobil yolu ilə hərəkət etməyə məcbur qalırlar. Piyada səkisi olmayan həmin ərazilərdə yaşayanlar, avtomobillərin sıx hərəkət etdiyi hissədə qalaraq ölümlə üz-üzə gəlirlər.
Səkisi olmayan yollardan biri də Sumqayıt Dəmiryolu Stansiyası istiqamətində olan Üzeyir Hacıbəyov küçəsidir. Bu yol insanların sıx hərəkət etdiyi yoldur. Qatardan düşən sərnişinlər səkinin olmaması səbəbindən yolun hərəkət hissəsi ilə hərəkət edirlər.
Məsələ ilə Sumqayıt şəhər İcra Hakimiyyəti ilə əlaqə saxladıq. Qurumun mətbuat xidmətinin rəhbəri Eyvaz Qocayev Xeberle.com-a açıqlamasında deyib ki, hazırda piyada səkilərində də mərhələli şəkildə təmir işləri aparılır:
"Sumqayıt şəhərində yol infrastrukturunun inkişafı ilə bağlı tədbirlər planı hazırlanıb. Tədbirlər planına uyğun olaraq avtomobil yolları ilə yanaşı, piyada səkilərində də mərhələli şəkildə təmir işləri aparılır. Eyni zamanda yeni səkilər salınır. Qeyd olunan ərazidə də yeni səkinin salınması nəzərdə tutulub”.
Elşən Yəhyayev
Xəbərdən istifadə edərkən istinad etmək vacibdir.
