Hazırda müasir tibb göz xəstəlikləri ilə yüksək səviyyədə mübarizə aparır, amma hələ də, insanlar gözə aid olmayan digər xəstəliklərin korluq yaradacağını bilmir. Təhlükə heç gözləmədiyiniz yerdən gələ bilər.
Bir müddətdir, istər böyüklər, istərsə də uşaqlar arasında göz agenda və qapağında ləkə və şişliklər yaranması və yayılması halı artıb. Göz isə həssas nahiyə olduğundan, yaranan hər bir problem insanı təşvişə salır.
Gözlərimiz daim qayğıya ehtiyacı olan ən həssas orqanlarımızdan biridir. Təbii olaraq, gözlərdə müxtəlif genetik və ya ətraf mühit təsirləri nəticəsində xəstəliklər yarana bilər. Göz xəstəlikləri göz qapaqlarında, göz yaşı kanallarında, gözün ətrafındakı sinir toxumalarında və s. meydana gələn bütün xəstəliklərdir.
Göz xəstəliklərinin əlamətləri nələrdir?
Xeberle.com-un əməkdaşı mövzu ilə bağlı Doktor.az klinikasının həkim-oftolmoloqu Rəna Nəbiyeva ilə həmsöhbət olduq. O göz xəstəliklərinin əsas əlamətlərini açıqlayıb:
"Gözlərdə ağırlıq və ağrı hissi, gözə hər hansı bir cismin qaçması hissi (sanki gözdə nəsə var), gözlərin tez-tez qaşınması və qızarıqlıq, gözlərdə sulanma, yaşarma, görmə qabiliyyətinin zəifləməsi – görmə sahəsinin daralması, göz qapaqlarında şişlik, gözləri qıyaraq baxmaq və s. əlamətləri qeyd edə bilərik”.
Bəs göz xəstəlikləri niyə yaranır?
"Göz xəstəliklərinin səbəblərini qeyd etmək istərdim. Yuxarıda qeyd etdiyimiz kimi, göz xəstəliklərinin müxtəlif yaranma səbəbləri var. Onlar arasında ən geniş yayılmış səbəblər və göz xəstəliklərini yaradan amillər bunlardır. Görməyə mane olan az və ya həddindən çox işıqlı yerdə çalışmaq, gözə yad cismin qaçması nəticəsində yaranan narahatlıqlar, diabet xəstəliyinin fəsadları, genetik amillər (ailə üzvlərində (qohumlarda və s.) göz xəstəliklərinin mövcud olması, gözlərdə quruluq, sinuzit, baş ağrısı, qrip və s. xəstəliklərinin əks təsirləri. Odur ki bu narahatlıqlardan hər hansı biri sizdə müşahidə olunursa, müayinə üçün həkimə müraciət edin”.
Elşən Yəhyayev
Xəbərdən istifadə edərkən istinad etmək vacibdir.
