Sumqayıt şəhəri, Kotec qəsəbəsində yol infrastruktu bərbad vəziyyətdədir.
Sakinlər Xeberle.com-a şikayətində bildirib ki, yolun 4-cü Polis Bölməsindən 8 nömrəli məktəbədək hissəsində çala-çuxurdur. Vətəndaşlar problemlə bağlı dəfələrlə müvafiq qurumlara müraciət etsələr də, təəssüf ki heç bir müsbət addım atılmır. Çala-çuxurlu, yamaqlı yollarla hərəkət etmək demək olar ki, mümkün deyil. Yolların böyük hissələri dağılıb və çuxurlar əmələ gəlib.
Qəsəbənin yollarının asfaltı çox yerdə dağılaraq yararsız hala düşüb. Küçələrin birləşdiyi dairələr də bu vəziyyətdədir. Qəsəbəiçi yollar isə çalalarla doludur. Sürücülər buradan keçərkən çətinliklə qarşılaşırlar, gecə saatlarında isə ziyana düşürlər.
Yağış yağdıqda çöküntülər su ilə dolur. Məktəbə gedən uşaqların hərəkəti isə məhdudlaşır.
Ərazidə yaşayan sakinlərin sözlərinə görə, yağıntılı hava şəraiti vəziyyəti daha da acınacaqlı edib. Onlar deyib ki, Sumqayıt şəhərində illərdir bir çox sahədə yenidənqurma və təmir-bərpa işləri aparılsa da, təəssüf ki, şəhərin bir çox küçə və qəsəbələrində avtomobil yollarının acınacaqlı vəziyyəti aradan qaldırılmır.
Elşən Yəhyayev
Xəbərdən istifadə edərkən istinad etmək vacibdir.
