Xəbər verdiyimiz kimi, Sumqayıt şəhəri, Kotec qəsəbəsində yol infrastruktu bərbad vəziyyətdədir.
Sakinlər Xeberle.com-a şikayətində bildirib ki, yolun 4-cü Polis Bölməsindən 8 nömrəli məktəbədək hissəsində çala-çuxurdur. Vətəndaşlar problemlə bağlı dəfələrlə müvafiq qurumlara müraciət etsələr də, heç kim addım atmır. Çala-çuxurlu, yamaqlı yollarla hərəkət etmək demək olar ki, mümkün deyil. Yolların böyük hissələri dağılıb və çuxurlar əmələ gəlib.
Qəsəbənin yollarının asfaltı çox yerdə dağılaraq yararsız hala düşüb. Küçələrin birləşdiyi dairələr də bu vəziyyətdədir. Qəsəbəiçi yollar isə çalalarla doludur. Sürücülər buradan keçərkən çətinliklə qarşılaşırlar, gecə saatlarında isə ziyana düşürlər.
Yağış yağdıqda çöküntülər su ilə dolur. İnsanların, məktəbə gedən uşaqların hərəkəti məhdudlaşır.
Ərazidə yaşayan sakinlərin sözlərinə görə, yağıntılı hava şəraiti vəziyyəti daha da acınacaqlı edib. Onlar deyib ki, Sumqayıt şəhərində illərdir bir çox sahədə yenidənqurma və təmir-bərpa işləri aparılsa da, təəssüf ki, şəhərin bir çox küçə və qəsəbələrində avtomobil yollarının acınacaqlı vəziyyəti aradan qaldırılmır.
Məsələylə bağlı Sumqayıt şəhər İcra Hakimiyyəti ilə əlaqə saxladıq. Qurumdan Xeberle.com-a verilən məlumata görə, qeyd olunan ünvanda da işlərin görülməsi nəzərdə tutulub: "Sumqayıt şəhərində yol infrastrukturunun inkişafı ilə bağlı tədbirlər planı mövcuddur. Tədbirlər planına uyğun olaraq mərhələli şəkildə şəhərin bütün ərazilərində asfaltlanma işləri həyata keçirilir. İl ərzində də Sumqayıt şəhərində onlarla küçələrdə asfaltlanma işləri aparılıb. Eyni zamanda məhəllə daxili yollarda da həm əsaslı təmir işləri , eyni zamanda dağılmış hissələrdə bərpa işləri aparılır. Qeyd olunan ünvanda da işlərin görülməsi nəzərdə tutulub”.
Elşən Yəhyayev
Xəbərdən istifadə edərkən istinad etmək vacibdir.
