Sumqayıt şəhərinin bəzi küçə və prospektlərində yol nişanlarının yenilənməsi və mövcud çatışmazlıqların aradan qaldırılması istiqamətində işlər hələ də qalmaqdadır. Biz dünyada olan bugünkü yol standartları ilə Azərbaycanın yollarını müqayisə etsək, görərik ki, müasir yol tələbinə cavab verən yollarımız, bəlkə də 50 faizdən azdır. Yolların çəkilməsi sadəcə asfaltın yerə döşənməsi ilə bitməməlidir. Müasir yol anlayışında yol infrastrukturu tam qurulmalıdır. Çünki yolun özü də bir növ nəqliyyat infrastrukturunun qoludur və infrastrukturun qurulması olduqca vacibdir. Yolların xətlənməsi, yol nişanlarının qoyulması, yollar istifadəyə veriləndən sonra əmələ gələn çuxurların təmir edilməsi, yolların işıqlandırılması çox vacibdir.
Mövzu ilə bağlı Xeberle.com-un əməkdaşı nəqliyyat eksperti Eldar Bəşirovla birlikdə Sumqayıtın müxtəlif yollarını müşahidə edib. Ekspert Sumqayıtda bir çox yollarda nişanların düzgün quraşdırılmadığını bildirib. Nəticədə Sumqayıtda yol nişanlarının düzgün quraşdırılmaması səbəbindən tez-tez yol-nəqliyyat hadisələri baş verir. Sürücülər də qoyulan nişanların düzgün quraşdırılmadığını söyləyirlər.
Müşahidəmizə əsasən deyə bilərik ki, yolların bəziləri piyadaların həyatı üçün böyük təhlükə yaradır. Piyada səkisi olmayan həmin ərazilərdə yaşayanlar maşınların sıx hərəkət etdiyi hissədə qalaraq ölümlə üz-üzə gəlirlər.
Sakinləri narahat edən digər problem isə yollarda səkinin olmamasıdır. Yaxud da səkinin üstündə obyektin və ya işıq dirklərinin yerləşməsidir. Nəticədə səki ilə hərəkət edən piyadalar qanunsuz tikililərlə rastlaşaraq, yolun ortası ilə hərəkət etmək məcburiyyətində qalırlar. Rastlaşdığımız maraqlı bir məqam isə pandüslərin düzgün quraşdırılmaması oldu. Piyada keçidinin bir tərəfində əlilərin keçməsi nəzərə alınsa da, digər tərəfində isə nəzərə alınmayıb. Nəticədə əlil arabası yolu keçə bilmir. Bu eyni zamanda, uşaq arabaları ilə övladlarını gəzdirən valideynlərin rahat hərəkətinə də problem yaradır.
Qeyd etdiyimiz kimi, əməkdaşımız nəqliyyat eksperti Eldar Bəşirovla şəhərin müxtəlif nöqtələrini müşahidə edərək, düzgün quraşdırılmayan yol nişanları ilə bağlı video sujet hazır edib. Ətraflı videonu izləyə bilərsiniz.
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
