Xəbər verdiyimiz kimi, Sumqayıtdan Bakı şəhəri istiqamətinə ictimai nəqliyyatın təşkili ilə bağlı sərnişin tələbatı nəzərə alınaraq, Azərbaycan Yerüstü Nəqliyyat Agentliyi (AYNA) tərəfindən Sumqayıt şəhər Avtovağzalını Bakı Beynəlxalq Avtovağzal Kompleksi ilə əlaqələndirəcək yeni ekspress marşrut xətti təşkil edilir. Xətdə 14 avtobus 11 dəqiqə intervalla sərnişinlərə xidmət göstərəcək.
Görəsən, ekspress avtobuslar Bakı-Sumqayıt yolunda illərdir davam edən tıxacın qarşısını alacaqmı? Yaxud da ekspress avtobusların sayı sərnişin sıxlığını aradan qaldıracaqmı?
Mövzu ilə bağlı nəqliyyat sahəsi üzrə ekspert, hüquqşünas Ərşad Hüseynov ilə həmsöhbət olduq.
O açıqlamasında qeyd edib ki, Sumqayıt-Bakı arasında yeni ekspres avtobus marşrutunun işə düşməsi irəliyə doğru ciddi addımdır: "Lakin görüləcək işlər hələ çoxdur. Dəfələrlə vurğuladığımız kimi, bu iki şəhər arasında təkcə vağzaldan-vağzala sərnişindaşıma ciddi uğurlar gətirməyəcək. Bu iki şəhərə vahid aqlomerasiya kimi, vahid mobillik zonası (məkanı) kimi baxılmalıdır. On minlərlə (bəlkə də yüz mindən çox) insan gündəlik olaraq (yəni mütəmadi olaraq), öz rutin həyatının axarı olaraq bu iki şəhər arsında gedib-gəlir. Bu şəhərlərdən birində yaşayıb, o birisində işləyirlər, təhsil alırlar və s. Bu, Sumqayıt yarandığı tarixdən belədir. Ona görə də Sumqayıtın bir neçə yerindən Bakının bir neçə yerinə və əksinə ictimai nəqliyyat təşkil edilməlidir”.
Onun sözlərinə görə, iki şəhər arasında qatarla daşıma imkanları da ciddi yaxşılaşdırılmalıdır: "Bunun imkanları araşdırılmaqla daha kiçik tutumlu (ehtiyac olan istiqamətdə həm də iri tutumlu) avtobuslarala ekspres marşrutlar yaradılmalıdır. Bu iki şəhər arasında qatarla daşıma imkanları da ciddi yaxşılaşdırılmalıdır. Əks təqdirdə bu iki şəhər arsında fərdi avtomobillər və taksilərlə səyahət sayını azaltmaq asan olmayacaq. Nəzərə alınmalıdır ki, müasir insan üçün təkcə gediş haqqı yox, həm də yola sərf edilən zaman çox vacibdir. Aqlomerasiya daxilində gündəlik səfərlər edən insanlar üçün vağzaldan-vağzala daşıma ciddi vaxt itkisidir. Heç də hər kəs bu itkiyə getmir (daha artıq pul xərcləsə də)...”
Digər bir nəqliyyat eksperti Eldar Bəşirov tıxacın aradan qaldırılması və avtobus qıtlığının bir daha olmaması barədə müsbət bir şey deyə bilməyəcəyini qeyd edib: "Əvvəlcə deyim ki, yeni avtobusların ayrılması ilə bağlı gözümüz aydın. Lakin, Bakı-Sumqayıt yolunda tıxacın aradan qaldırılması və avtobus qıtlığının bir daha olmaması barədə müsbət bir şey deyə bilmərik. Köhnə hamam, köhnə tas olacaq. Nə qədər ki, yeni yollar açılmayacaq, tıxac problemi olduğu kimi qalacaq. Avtobusların sayını da artırsalar daha yaxşı olar. Bu da onların insafına baxır”.
Elşən Yəhyayev
Xəbərdən istifadə edərkən istinad etmək vacibdir.
