Gənclik hərəkət, axtarış, nailiyyət, həyata yeni baxış deməkdir. Gənclər adət-ənənələrimizin, milli-mənəvi dəyərlərimizin daşıyıcısı, cəmiyyətimizin aparıcı qüvvəsidir. Belə yüksək keyfiyyətləri özündə cəmləşdirən, sözün əsl mənasında milli sərvətimiz olan gənclərə qayğı ilə yanaşılması tələb edilir. Bu baxımdan dövlət orqanlarının, ictimai təşkilatların, bütövlükdə cəmiyyətin üzərinə böyük vəzifə düşür.

1994-cü ildə Gənclər və İdman Nazirliyi və onun yerli idarələrinin yaradılması, gənclərin forumlarının keçirilməsi, "2 Fevral — Azərbaycan Gəncləri Günü”nün təsis edilməsi, çoxsaylı dövlət proqramlarının, qanunların qəbulu, gənclərin dövlət quruculuğu işlərinə geniş cəlbi, onların cəmiyyətdə fəal iştirakı ilə yanaşı, sosial problemlərin həllinə əlverişli mühit yaratdı. Bu siyasətin məntiqi nəticəsi olaraq Sumqayıt şəhərində də əhəmiyyətli uğurlara nail olunur. Həmişəki kimi, bu gün də Sumqayıtda gənclik ruhu hakimdir. Şəhərin ictimai fəal gənclərini hər zaman nümunə olaraq göstərirlər. Sumqayıtın şöhrətinin daha da artırılmasına şərəfli bir məsuliyyət hissi ilə yanaşan gənclər öz nailiyyətlərini durmadan artırırlar. Daim şəhərin ab-havasına yenilik qatan gənc sumqayıtlılar yüksəlişin ən dinamik və hərəkətverici qüvvəsi sayılırlar. Sumqayıtda görülən bütün işlər gənclərin inkişafına, məşğulluğuna və asudə vaxtının səmərəli keçirilməsinə xidmət edir.

 

Dövlət gənclər siyasətinin Prezident İlham Əliyev tərəfindən uğurla davam etdirilməsinin nəticəsidir ki, bu gün Azərbaycan gəncləri bütün sahələrdə hərtərəfli uğur və naliyyətlər əldə edərək özlərini doğruldurlar. Gənclər bu gün dövlət orqanlarında, özəl sektorda və digər strukturlarda təmsil olunur, cəmiyyətin inkişafına öz töhfələrini verirlər. Hər zaman gənclərə böyük qayğı və diqqətlə yanaşan Azərbaycan Prezidenti İlham Əliyevin gənclik şəhəri Sumqayıta son səfərləri, buradakı bir sıra sosial-mədəni obyektlərin açılışında iştirakı hədsiz minnətdarlıq duyğuları ilə xatırlanır. Fərəhlidir ki, Sumqayıt gəncləri onlara göstərilən diqqətə yeni-yeni nailiyyətləri ilə cavab verirlər. Son illərdə Sumqayıtın istedadlı gəncləri mədəniyyət, incəsənət, elm və idman sahələrində uğurları ilə seçilib, zirvə yollarında inamla irəliləyiblər. Belə ki, onlarca sumqayıtlı gənc elmi dərəcə alıb, ali məktəblərə qəbul imtahanlarında yüksək nəticə göstərib və Prezident təqaüdünə layiq görülüb. Beynəlxalq bilik olimpiadalarından qələbə ilə qayıdan sumqayıtlı gənclər də az olmayıb. Həyatın bütün sahələrində olduğu kimi, təhsil sahəsində də sumqayıtlı gənclər böyük uğurlar qazanırlar.  Təhsil sahəsində qazanılan uğurlar Sumqayıtı yenə də ölkə üzrə ən öncül mövqeyə çıxarmışdır.

Yüksək nailiyyətlər əldə etmiş Sumqayıt idmançıları və onların məşqçiləri daim ölkə rəhbərliyinin,
Gənclər və İdman Nazirliyinin, Milli Olimpiya Komitəsinin, eləcə də şəhər rəhbərliyinin diqqət mərkəzində olmuş və mükafatlandırılmışlar.

2020-ci ilin 27 sentyabrından başlanan və 44 gün davam edən Vətən müharibəsində Sumqayıt şəhəri də neçə-neçə oğlunu şəhid verib. Rəşadətli Azərbaycan Ordusunun sıralarında Vətən uğrunda vuruşan qəhrəman gənclərimiz adlarını xalqımızın ən yeni tarixinə qızıl hərflərlə yazdı. Müharibənin ilk günlərindən böyük ruh yüksəkliyi ilə cəbhəyə yollanan yüzlərlə sumqayıtlı könüllü gənc, həmçinin hərbi xidmətdə olan əsgər və zabitlər torpaqlarımızın işğaldan azad edilməsi uğrunda başlanan Vətən savaşında şərəfli döyüş yolu keçib, qəhrəmanlıq göstəriblər.