Azərbaycanda bəzi restoran sahibləri müştərilər üçün əlavə aldadıcı menyular hazırlayır. Bu məsələ müxtəlif sferalarda dəfələrlə müzakirə mövzusu olub. Sahibkarlar bir çox hallarda nəinki əcnəbi müştərilərin, eləcə də yerli vətəndaşların da "cibinə girməyə” çalışırlar.
Görünən odur ki, restoranlar əlavə qazanc əldə etmək üçün yeni fırıldaqlara əl atırlar. Sözügedən problem Sumqayıt şəhərində də müştəriləri dilə gətirib.
Sumqayıt şəhər sakini Bəxtiyar Xudiyev sözügedən problemlə bağlı Xeberle.com-a müraciət edib. O müraciətində qeyd edib ki, Sumqayıtın bəzi restoranlarının menyu qiymətləri heç də reklam edildiyi kimi deyil:
"Salam hörmətli redaksiya! Doğma şəhərimizin media qurumu kimi sizin şəhərimizdə qanun pozuntularına qarşı biganə olmadığınızı bilərək sizə üz tutmuşam.
Yaşadığımız Sumqayıt şəhərində hər addımbaşı istehlakçıların hüquqları pozulur. Yaradılmış KOBİA, DOST və s. kimi bəzəkli adlara malik qurumlarda işıqlı otaqlarda oturan yaraşıqlı qalstuklu əməkdaşlar isə sadə vətəndaşların pozulan hüquqlarının qorunması üçün heç bir tədbir görmür və "gedin məhkəməyə müraciət edin” deyərək işlərini bitmiş bilirlər. Hamını da məhkəməyə göndərəcəklərsə, o zaman hər yer bağlansın, təkcə məhkəmələr işləsin də gərək.
Dostlarla bu günlərdə yeni ili qeyd etmək üçün normal qiymətə ucuz məkan axtararkən, sosial şəbəkə resurslarında durmadan 4 şiş kabab sifariş verən müştəriyə guya özlərinin dili ilə desək 16 XOLODNU (Soyuq qəlyanaltı) cəmi 8 AZN lövhəsini reklam edən Sumqayıt şəhəri 9-cu mikrorayonunda köhnə "Aygün" şadlıq evi adlanan yerin düz yanındakı "SƏRİN" restoranına üz tutduq və sözün əsl mənasında qarlı soyuq havada "Sərinlədik". Bu obyektin girişində də "Sərin" restoranı yazısının düz aşağısında həmin 4 şiş kabab sifariş verən müştəriyə guya özlərinin dili ilə desək 16 XOLODNU cəmi 8 AZN reklam lövhəsini gördük və bu qədər də yalan olmaz düşünərək, içəri daxil olaraq arxayıncasına sifarişlərimizi etdik. Yeməkləri barədə pis bir söz deyə bilməsək də göz görə-görə küçəyə istiqamətlənmiş Sumqayıt Regional Reklam İdarəsinin diqqətsizliyi ucbatından "Soyuq qəlyanaltı" əvəzinə "XOLODNU" yazaraq rəsmən camaatı aldatmaqla məşğuldurlar.
Sosial şəbəkələrdə və girişdə lövhə şəkilində 4 şiş kabab sifariş verən müştəriyə guya özlərinin dili ilə desək 16 XOLODNU cəmi 8 AZN yazılsa da, 16 şiş kabab yesək də 12 ədəd "XOLODNU" bizə 16 AZN-ə başa gəldi. Etirazımızı bildirsək də artıqlaması ilə hesabı ödəyib çıxıb getdik.
Çıxarkən biz aldandıq, qoy digərləri aldanmasın deyiminə söykənərək, bu yalançı və doğma ana dilimizə hörmətsizcəsinə yazılmış və asılmış bu reklam lövhəsinin və hesab vərəqinin rəsmini xatirə olaraq çəkdik. Gerisi aidiyyatı qurumların boynuna!”
Məsələ ilə bağlı Azad İstehlakçılar İctimai Birliyinin sədri Eyyub Hüseynov ilə həmsöhbət olduq. O qeyd edib ki, bu problem, nəinki turistləri, yerli camaatı da narahat edir: "Sumqayıt şəhəri, Novxanı qəsəbəsində yerləşən restoranlardan da bu məsələ ilə bağlı şikayətlər var. Vətəndaş şişirdilmiş qiymətlərdən narazılıq edir. Sifariş edilən çayın yanında verilən istənilən təam barədə müştəriyə sual verilməlidir. Təbii ki, əgər bu, menyuda qeyd edilən çayın qiymətinə daxil deyilsə, Nazirlər Kabineti istehlakçıların hüquqlarının müdafiəsi istiqamətində müvafiq qanun layihəsi hazırlamadığı üçün bu problemlə qarşılaşan şəxslər kimə şikayət edəcəklərini bilmirlər. Sahibkarlar başa düşmürlər ki, bu, birinci növbədə turizm sektoruna zərbədir. Aparılan monitorinqlər, ictimai qınaq müəyyən qədər bu problemlərin aradan qaldırılmasına kömək etsə də, paytaxtın mərkəzində fəaliyyət göstərən restoranların 60 faizində hələ də eyni problem qalır. Bu problemin qarşısının alınması üçün tədbir görülməsə, vətəndaşların hüquqları pozulmağa davam edəcək. Bu gün onların başına gələn haqsızlıq, sabah sizin və bizim də başımıza gələ bilər”.
Elşən Yəhyayev
Xəbərdən istifadə edərkən istinad etmək vacibdir.
