Sumqayıtda sürücülərin kütləvi şəkildə qayda pozduqları yerlərdən biri də 17-ci mikrorayonu, İsmət Qayıbov və Kamal Axundov küçələrinin kəsişməsində yerləşən yoldur. Dörd yol kəsişməsində piyada keçidi olsa da, sürücülərin heç biri orada dayanmır. Hamısı gəldiyi sürətlə də yollarına davam edirlər.
Hər gün övladının həmin yolu keçməsindən narahat olan şəhərin 51-ci məhəllə sakini İdris Maşiyev Xeberle.com-a müraciət edərək bildirir ki, sözügedən yol kəsişməsinə radar qoyulsun. Qeyd edib ki, şəhərin 33 nömrəli avtobus xəttinin sürücüləri də qaydalara məhəl qoymur:
"Xahiş edirəm ki, 17-ci mikrorayonunda dörd yol kəsişməsində radar qoyulsun. Bəlkə, o zaman marşrut və minik avtomobilləri işıqfora uyğun hərəkət edərlər. Sözügedən yoldan hər gün uşaqlar məktəb getmək üçün istifadə edirlər. Lakin, avtomobillər yoldan sürətlə hərəkət edirlər. Ən əsası da 33 nömrəli marşrut avtobuslar sürət hədddini aşırlar. 
Şəxsən, özüm bir neçə dəfə yol mənim ola-ola keçərkən 33 nömrəli marşrut avtobusu qırmızı işığın yanmasına məhəl qoymayaraq üstümə hərəkət edib. Hətta, bir dəfə özüm sözügedən avtobusun içində olan zaman, kimsə sürücüyə qırmızı işıqdan keçməsi ilə bağlı irad bildirdi. Sürücü isə cavabında gecikməsi səbəbindən keçdiyini bəhanə gətirdi. 
Orada bildiyiniz kimi, yol iki tərəflidir. Yolun bir hissəsini keçib avtomobillərə yol veririk. O zamana qədər qırmızı işıq da yanır. Gözləyirik ki, yaşıl yansın, sonra iti addımlarlayolu keçək. Çünki, dönən maşınlar piyadanı gözləmir. Uşaqlarımız hər gün məktəbə gedir. Narahat oluram. Özüm yolu qorxa-qorxa keçirəm. Bəs, uşaq həmin yolu necə keçsin?!”
Mövzunu davam etdirəcəyik.


Elşən Yəhyayev