Bunu Xeberle.com-a açıqlamasında Mədəni İrsin Qorunması, İnkişafı və Bərpası üzrə Dövlət Xidmətinin Şabran Regional İdarəsinin Sumqayıt şəhəri üzrə nümayəndəsi Məhəbbət Qasımova bildirib.

Hamamın olduğu əraziyə zibil tökülməməsi ilə bağlı sakinlərə dəfələrlə xəbərdarlıq olunub, onlarla maarifləndirici söhbətlər də aparılıb. Tarixi abidə əvvəllər də bir neçə dəfə zibildən təmizlənib, ətrafda yaşayan insanlara tarixi abidənin zibilləndirilməməsi barədə xəbərdarlıq olunub.

Həmçinin abidənin bərpa olunması məsələsi də gündəmdədir.

Qeyd edək ki, sözügedən tarixi hamam Sumqayıt şəhərinin Corat qəsəbəsində, Səməd Vurğun küçəsindən 60-70 metr aralıda, qəsəbənin daxilinə uzanan küçənin sağ tərəfində yerləşir. Corat qəsəbəsində mövcud olmuş iki hamamdan biridir. Qəsəbə sakinləri arasında köhnə hamam olaraq tanınır. Hamamın XVI əsrdə tikilməsi qeyd olunur. Sonuncu dəfə 1985-ci ildə təmir olunub. 1988-ci ilə qədər istifadə olunan hamam hazırda istifadəsiz və baxımsız vəziyyətdədir.