Sumqayıtlı məktəbli Nuray İbadova dünya çempionatına lisenziya qazanıb. O, oktyabr ayında İtaliyada keçiriləcək karate üzrə dünya çempionatında mübarizə aparacaq.
"Karatenin brilliantı” Rafael Ağayevin tələbəsi olan Nuray İbadova Xeberle.com-un əməkdaşı ilə hömsöhbət olub:
Səni yaxından tanıyaq.
Mən, İbadova Nuray 2009-cu ildə Sumqayıt şəhərində anadan olmuşam. Hazırda Sumqayıt şəhəri 24 saylı tam orta məktəbin 9-cu sinif şagirdiyəm. Həmçinin "Qara Brilliant” karate klubunun üzvüyəm.
Yaxın vaxtlarda səni hansı yarışlar gözləyir?
Bu ilin iyun ayında Bakı şəhərində "Naxçıvan MR-nın 100 illiyinə həsr olunmuş döyüş idman növləri” festivalı olacaq. Bu yarışda mən də iştirak edəcəm.
Necə oldu ki, bu idman növü ilə məşğul olmağa qərar verdin?
Məndən başqa 2 qardaşım da karate idman növü ilə məşğuldurlar. Böyük qardaşım Nihad İbadov həm ölkəmizdə, həm də ölkəmizdən kənarda keçirilən beynəlxalq yarışlarda uğurla iştirak edərək medallar qazanmışdır. 2019-cu ildə Şimali Makedoniyanın paytaxtı Skopye şəhərində keçirilən Avropa çempionatında həm qızıl, həm bürünc medal, 2021-ci ildə isə Türkiyənin İstanbul şəhərində keçirilən dünya çempionatında yenə də həm qızıl, həm də bürünc medal qazanaraq ölkəmizi uğurla təmsil etmişdir. Balaca qardaşım Mayıl İbadov da karate idman növü ilə məşğuldur. O da bir çox yarışlarda iştirak edib və medallar qazanmışdır. Həmişə onların məşqlərini izləyirdim. Qardaşlarımın uğurları və Pərviz Quliyevin məşq keçməsi məni karate idman növü ilə məşğul olmağa həvəsləndirirdi. Qərara gəldim ki, mən də dərslərə qoşulum. Hazırda "Qara Brilliant” karate idman klubunda məşq edirəm. Klubumuzun rəhbəri Rəfael Ağayev, baş məşqçimiz Pərviz Quliyev və məşqçimiz isə Orxan Heydərovdur.
Bu yaxınlarda hansısa beynəlxalq turnirə qatılacaqsan?
Bu ilin oktyabr ayında İtaliyada baş tutacaq dünya çempionatında iştirak üçün mən də lisenziya qazanmışam. Hazırlıqlarımız davam edir, inşallah bu yarışda ölkəmizi uğurla təmsil etmək qismət olar.
Rafael Ağayevin tələbəsi olmaq necə bir hissdir?
Karatenin "qara brilliantı” sayılan Rafael Ağayev 5 qat dünya çempionu, 11 dəfə Avropa çempionu, bu yaxınlarda fərdi yarışlarda ən çox dünya çempionu olan idmançı kimi Ginnesin Rekordlar kitabına düşüb. Rafael Ağayevin tələbəsi olmaq çox şərəflidir. Həmçinin məsuliyyətli olmaq lazımdır. Bizim təlim məşq proseslərinə çox ciddi nəzarət edir. Gələcəkdə çempion olmağımız üçün bizdən işgüzarlıq, peşəkarlıq, prinsipiallıq tələb edir. Rafael Ağayev bizlərə həmişə söyləyir: Çempion olmağımız üçün əsas şərt iradədir. Böyük uğurlar qazanmaq, yaddaqalan nailiyyətlər əldə etmək üçün çox çalışmaq lazımdır. Məndə müəllimlərimin əziyyət və əməklərini yerdə qoymamaq üçün var gücümlə, bütün iradəmlə çalışacağımı bildirmək istəyirəm.
Şəhərimizdə idmana qayğı necədir? Səncə, idmançılara diqqət göstərilir?
İdmana qayğı bu gün dövlətimizin əsas prioritet məsələlərindən biridir. Gəncləri pis vərdişlərdən, zərərli adətlərdən çəkindirmək, idman vasitəsilə onları layiqli Azərbaycan vətəndaşlarına çevirmək, Azərbaycanı idman sahəsində dünyaya tanıtdırmaq ulu öndər Heydər Əliyevin idman siyasəti idi. Demək olar ki, bu siyasət uğurla nəticələndi və müvəffəqiyyətlə davam etməkdədir. Prezident İlham Əliyevin 2005-ci il 4 mart tarixli "Bədən tərbiyəsi və İdman günü” nün təsis edilməsi haqqında sərəncamına uyğun olaraq ölkəmizdə hər il 5 mart "Bədən tərbiyəsi və İdman Günü” kimi qeyd edilir. Bu gün paytaxtımız Bakı ilə yanaşı, digər şəhər və rayonlarımızda da inşa edilən Olimpiya İdman Kompleksləri idmana olan qayğıdan xəbər verir. Sumqayıt hər zaman perspektivli idmançılara malik olmuşdur. Şəhərimizdə bir çox idman zalları, idman klubları mövcud olmuş və olmaqdadır. Bizim "Qara Brilliant” karate klubu da onlardan biridir.
Ölkə xaricində Vətəni təmsil etmək necə hissdir?
Bu gün Azərbaycan dünyada idman ölkəsi kimi tanınır. Qalib xalqı təmsil etmək böyük məsuliyyətdir. Dünyanın hər bir hissəsində olarkən ölkəmizi ləyaqətlə təmsil etmək və idmana öz töhfələrimi vermək ən başlıca hədəfimdir.
Azərbaycanda karate idman növündə perspektivli idmançılardan kimlərin adını çəkə bilərsən?
Ölkəmizdə perspektivli karateçilərimiz çoxdur. Qızlardan Fatimə Məmmədova, Aysel Səmədova, oğlanlardan isə Fərid Hacıyev, Aslan Dostuyev, Nihad İbadov və Fərid Məmmədovun adını çəkə bilərəm.
Karate və digər döyüş idman növlərinin adı çəkilərkən, əksəriyyətin ağlına oğlanlar gəlir. Sənə "Qız hara, karate hara?” deyən olub?
Bəli, Azərbaycan da bu belədir. Amma, biz xaricdə beynəlxalq yarışlarda olanda onlarda karateçi qızların oğlanlardan az olmadığını görürük. Biz də isə fərqlidir, qızları idmana demək olar ki az qoyurlar, sona kimi dəstəkləmirlər. Məndə isə belə deyil, ailəm hər zaman məni dəstəkləyir, yarışlarda yer tutmasam belə məni ruhdan düşməyə qoymurlar, əksinə məşqlərimə davam etməyim üçün mənə motivasiya verirlər. Məncə də bu əsas şərtdir. İdmançının ən böyük dəstəkçisi ailəsi olmalıdır .
Adətən oğlanlar idmançı xanımlardan çəkinirlər. Karateçi olmaq sənə ürəyini açmaq istəyən oğlanlara mane olmayıb?
Mənim 15 yaşım var. Belə bir şeylə qarşılaşmamışam.
Azərbaycanda idmançı xanımların əksəriyyəti ailə qurduqdan sonra karyeralarını bitirirlər. Sənin bu yöndə fikirlərin nədir?
Mənim gələcəkdə idman karyeramla bağlı böyük hədəflərim var. Qarşıda məni daha çox yarışlar gözləyir. Bütünlüklə karyerama fokuslanmışam. İnşallah ki, hədəflərimə çatmaq qismət olar.
Azərbaycanda ən çox bəyəndiyin idmançı kimdir?
Bəyəndiyim idmançılar qızlardan Mədinə Sadıqova , oğlanlardan isə Firdovsi Fərzəliyevdir.
Bizə vaxtını ayırdığın üçün təşəkkür edirəm.
Sağ olun.
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
