Xəbər verdiyimiz kimi, vətəndaşların "20 Yanvar” metrostansiyasından Sumqayıta gedişində çətinlik yaranıb. Bu, ərazidə avtobus zolağı çəkiləndən sonra baş verib. Məsələ ilə bağlı Azərbaycan Yerüstü Nəqliyyat Agentliyindən bildirilib ki, "20 Yanvar” metrostansiyası istiqamətində avtomobillərin pərakəndə və xaotik dayanması, eləcə də paytaxtdan əsasən Sumqayıt şəhəri istiqamətinə hərəkət edən qeyri-müntəzəm avtobuslar Tiflis prospektinin bu hissəsində günün istənilən saatında ciddi tıxaclara səbəb olurdu və müntəzəm avtobus marşrutlarının fəaliyyətinə maneə yaradırdı.
"Tiflis prospektinin "20 Yanvar” metrostansiyası istiqamətində xüsusi hərəkət zolağının təşkili ilə ictimai nəqliyyat istifadəçilərinin rahat, maneəsiz və əlavə vaxt itkisinə məruz qalmadan daşınmasına şərait yaranıb.
Paytaxtdan Sumqayıt şəhərinə yola düşmək istəyən vətəndaşlar isə Bakı Beynəlxalq Avtovağzal Kompleksinin (BBAK) imkanlarından yararlana bilərlər. Məhz buradan iki şəhərin avtovağzalını birləşdirən komfortlu ekspres avtobuslar 11 dəqiqəlik hərəkət intervalı ilə sərnişinlərə xidmət göstərir. Bakı-Sumqayıt şosesində yaradılan xüsusi hərəkət zolağı isə sərnişinlərin rahat və sürətli daşınmasını təmin edir. Təhlillərə əsasən, zolaqla hərəkət edən avtobusların son dayanacağa çatma müddəti 25-30 dəqiqə təşkil edir. Vətəndaşlar Sumqayıta daha tez çatmaq üçün bir dayanacaq irəli getməklə BBAK-dan müasir və komfortlu "Neoplan”larla yola düşə bilərlər.
Məsələ ilə bağlı ciddi narazılıqlar yarandığından Xeberle.com saytı olaraq mövqeyimizi bildirmək istərdik. Birincisi hazırda bütün dünyada nəqliyyat sistemində mobillik, rahatlıq və əlçatanlıq prinsipləri əsas önəm kəsb edir.
Bakı Beynəlxalq Avtovağzal Kompleksinə getmək üçün Avtovağzal metrostansiyası çox nataraz yerdə yerləşir və bildiyimiz kimi, oraya birbaşa metro xətti də mövcud deyil. İkincisi, sakinlərinin yarısının Bakıda işlədiyi Sumqayıt şəhəri bizim bildiyimiz qəsəbə və ya şəhərcik deyil ki, paytaxtdan daşınma onun yalnız bir nöqtəsinə Sumqayıt şəhər avtovağzalına həyata keçirilsin. Üçüncüsü, Sumqayıt avtovağzalı da bunun üçün heç hazır deyil və orada normal şəhərdaxili nəqliyyat xabı sistemi formalaşmayıb.
Bu gün Sumqayıt, Xırdalan və Bakı az qala vahid meqapolis kimi çıxış edir və sərnişindaşıma Qafqazın 2-ci böyük sənaye şəhəri olan, yarım milyonluq Sumqayıtın azı 2 nöqtəsinə təşkil edilməlidir. Üstəlik, mütləq şəkildə 20 yanvar metrostansiyası ərazisindən. Bu işləri hər gün adıçəkilən yoldan istifadə edən sakinlərin rahatlığını nəzərə almaqla uyğun şəkildə həyata keçirmək mümkündür.
Beləliklə, nədən başlamaq lazımdır... 20 Yanvar metrostansiyası ərazisində təxminən "Bravo” supermarket yaxınlığında 2 avtobusun birlikdə rahat dairə vura biləcəyi qədər təxminən 2-3 sot ölçüdə məkan ayrılmalıdır. Ekspress avtobuslar orada Bakı Beynəlxalq Avtovağzal Kompleksindəki kimi növbəlilik qrafiki ilə Ceyranbatan və Saray qəsəbələri istiqamətində olmaqla Sumqayıtın azı 2 nöqtəsinə (Sumqayıt avtovağzalı və şəhərin mikrorayonlar hissəsi) sərnişin daşımalıdır. Belədə həm vaxt itkisinə az yol veriləcək həm də əlçatanlıq və mobillik təmin olunacaq. Bu işlər uğurla həyata keçirilərsə, kimsə o manatlıq taksilərə gözucu da baxmayacaq. Nəqliyyat eksperti olmasaq da, informasiya saytı olaraq mövqeyimizi bildirməyi özümüzə borc bildik, gerisi AYNA-nın ixtiyari-insafına!
Elnur Ağayev,
Xeberle.com
Xəbərdən istifadə edərkən istinad etmək vacibdir.
