"Sumqayıt Dövlət Universitetində yay imtahan sessiyasının başlanması ilə əlaqədar kütləvi rüşvətalma kampaniyasına başlanılıb”.
Xeberle.com məlumat verir ki, bununla bağlı informasiya Editor.az-a universitetdəki mənbələrdən daxil olub.
Mənbənin sözlərinə görə, hətta oxuyan uşaqlar da bir neçə yüz manat pulundan keçməli olur:
"Nadir Qəhrəmanov bu universitetə rəhbərlik etdiyi dövrdən bu ali məktəbin adını "dollar universitet” qoymuşdular. Elxan Hüseynov Sumqayıt Dövlət Universitetinə rəhbər təyinatı alandan sonra hamı bu vəziyyətin dəyişəcəyinə ümid edirdi. Hesab edirdik ki, Elxan Hüseynov Bakı Dövlət Universiteti kimi qocaman ali təhsil ocağında prorektor olub, Azərbaycan Türkmənistanda səfir kimi təmsil edib. Bütün gözləntilərimiz puç oldu. O, nəinki yaxşı mənada fərqlənə bildi, əksinə, universitet mənfi istiqamətdə geriyə getdi. Bu gün Sumqayıt Dövlət Universitetində "şirinlik” vermədən, hər sessiya öncəsi 500-700 manat arası pulundan keçmədən, sessiyanı kəsirsiz başa vurmaq mümkün deyil. Bütün tədris müddətində tələbələrə şərait yaradılır ki, dərs qaiblərini çoxaltsınlar. Sessiyanın sonunda isə bunun haqq-hesabı çəkilir. Ardınca imtahanlarda tələbələrdən pul alınır. Özü də bütün bu prosesin başında universitetin rektoru Elxan Hüseynov dayanır”.
Məsələ ilə bağlı Xeberle.com SDU-nun Mətbuat xidmətinin rəhbəri Nazxanım Cəlilli ilə əlaqə saxlayıb. Mətbuat xidmətinin rəhbəri yayılan informasiyaya belə aydınlıq gətirib: "Rektor qəti tapşırıq verib ki, belə hallara yol verilməsin. Struktur tamam dəyişdirilib. Qiymətləndirmə mərkəzi yaradılıb. Elə söhbət yoxdur. Onu kim yazıbsa səhv yazıb. Kimin şikayəti varsa bizə müraciət edə bilər.”
Xeberle.com