Bir vaxtlar bura Sumqayıt Elektrik Stansiyasının balansında olub. Söhbət Sumqayıt şəhəri 26-cı məhəllədə yerləşən "Energetiklər” sanatoriyasından gedir. Hazırda isə bu binanın bircə adı qalıb. Burada sanatoriyadan əsər əlamət də yoxdur.
Belə ki, ermənilərin torpaqlarımızı işğal etməsi nəticəsində öz dədə-baba yurdlarından didərgin düşən, Laçın, Şuşa, Füzuli və digər rayonlardan olan 70 ailə bu binada məskunlaşıb. Az qala Sumqayıtla yaşıd olan binanın vəziyyəti ötən ilin payızına kimi çox bərbad halda olub. Ötən ilin payızında isə tale məcburi köçkünlərin üzünə gülüb. ABŞ-ın "Dünyaya baxış” beynəlxalq humanitar təşkilatının dəstəyi ilə tikili təmir edilib. Binada yaşayan sakinlər sevincək olublar ki, onları da yada salan olub. Amma gəl ki, əsas problemlər bundan sonra yaranmağa başlayıb. Belə ki, bina təmir olunan zamanı tikilinin kommunal xətləri bərbad hala salınıb. Binanı elektrik xətləri isə sanki hörümçək toruna bənzəyir. Sakinlər deyirlər ki, binaya təbii qaz problemi də var və üstəlik bu problemin üzərinə biri də əlavə olunub.

Bəzi mənzillərdə də çatlar əmələ gəlib. Binanın kanalizasiya xətləri bərbad vəziyyətə salınıb və düzgün formada çəkilməyib. Bu səbəbdən də binanın kanalalizasiya suları və tullantılar birbaşa binanın zirzəmisinə axır. Belə getsə bina kanalizasiya suları nəticəsində qəzalı vəziyyət düşəcək. Çünki axan tullantı sular tikilinin birbaşa özülünə təsir göstərir. Şübhəsiz ki, bu da binaya təsirsiz ötüşməyəcək. Bu azmış ki, ərazidə üfunət qoxusundan dayanmaq olmur. Kanalizasiya suları az qala binanın həyətinə qədər gəlib çıxsın.

Sakinlər hələ də ümidlərini üzməyiblər. Biz də ümidvarıq ki, məcburi köçkünlərin bu probleminə aidiyyəti qurumlar biganə qalmayacq və yaxın zamanda onların problemi öz həllini tapacaq.

Xeberle.com Sumqayıt TV-yə istinadən həmin reportajı təqdim edir.