Hər bir xalqın inkişafı onun təhsili ilə, elmi ilə bilavasitə bağlıdır. Hər il Sumqayıt təhsili yetişdirdiyi istedadlı şagirdlərin beynəlxalq və respublika əhəmiyyətli yarış və müsabiqələrdə qazandıqları uğurlarla, əldə etdikləri nailiyyətlərlə yadda qalır. Əlbəttə, diqqət və qayğı, işgüzar elmi yanaşma olan yerdə uğurların artması da təbiidir. Xeberle.com-un əməkdaşı təhsil həyatında bir sıra uğurlar qazanan, Sumqayıt təhsilinin yetirməsi Ramazan Əsgərxanov ilə həmsöhbət olub:
-Ramazan, səni yaxından tanıyaq...
- 2002-ci il dekabr ayının 3-də Sumqayıt şəhərində anadan olmuşam. 2009-cu ildə Sumqayıt şəhər F.Piriyev adına 18 nömrəli tam orta məktəbin 1-ci sinifinə daxil olmuşam, 2020-ci ildə həmin məktəbi bitirib, 600 balla Azərbaycan Respublikası Dövlət Gömrük Komitəsi Akademiyasının hüquqşünaslıq ixtisasına qəbul olunmuşam. 4 il sonra oranı Akademiya və ixtisas birincisi kimi fərqlənmə diplomu ilə başa vurmuşam. Akademik göstəricim 97.09 olub. Hökumətlərarası Təqaüd Proqramı olan Türkiyə Burslarının qalibiyəm. Təhsilimin növbəti pilləsi olan magistraturanı Ankara Universitetinin Hüquq fakültəsinin Özəl hüquq bölümündə davam etdirəcəm.
-Asudə vaxtını necə dəyərləndirirsən?
- Boş vaxtlarda öz sahəmə aid kitablar, monoqrafiyalar oxuyuram. Daha çox Ali Məhkəmənin, Konstitusiya Məhkəməsinin Plenum qərarları ilə tanış oluram. Musiqi dinləyirəm. Teatra getməyi sevirəm. Ən çox getdiyim Sumqayıt Dövlət Dram Teatrı və Akademik Milli Dram Teatrıdır.
-Orta məktəbdə oxuyarkən digər şagirdlərdən nə iləsə fərqlənmisən? Ümumiyyətlə, orta məktəbdə necə oxuyurdun?
- İstər orta, istərsə də Akademiyada sosial aktiv tələbə olmuşam. Sumqayıtda keçirilən bütün şeir, təqdimat və esse müsabiqələrində iştirak etmişəm. Müxtəlif hədiyyə və diplomlarım da vardır. Hər zaman fərqli olmağa çalışmışam: istər məktəbdə oxuyanda, istərsə də Akademiyada təhsil aldığım dövrdə. Orta məktəbdə də qiymətlərim yüksək olub.
-Gələcəyə dair planların nədir?
- Əlbəttə ki, öz sahəm üzrə təhsilimin növbəti pilləsi olan doktorantura təhsili almaq, daha çox mülki hüquq, ailə hüququ sahələrində ixtisaslaşmaq istəyirəm. Arzular çoxdur. Həyat vəfa etsə, nail olmağa çalışacam.
- Sumqayıt təhsilinin səviyyəsini necə qiymətləndirirsən?
- Deyərdim ki, Azərbaycanda ən yüksək səviyyədə təhsil Sumqayıtdadır. Hətta, mən Akademiyaya ilk daxil olanda müəllimlərimiz hansı məktəblərdə oxuduğumuzu soruşanda, Sumqayıtı eşidən kimi deyirdilər ki, oranın təhsili yüksəkdir. Bunu hər il Dövlət İmtahan Mərkəzinin statistikasından da görmək mümkündür. İnanıram ki, Sumqayıt təhsili daha da irəliləyəcək.
-Konkret sual verək, Sumqayıt təhsili sənə nə qazandırıb ki?
- Sumqayıtda təhsil almaqla mən sosiallaşmışam, yeni dostlar qazanmışam. Sumqayıtda bir sıra bilik yarışları təşkil edilirdi. Biz də məktəbimizi layiqincə təmsil edirdik.
-Şəhərimizdə hansı yeniliklərin tətbiq edilməsini istəyərdin?
- Sözün düzü, bu suala cavab verməkdən çətinlik çəkirəm. Çünki Sumqayıt çox gözəl şəhərdir, səliqəlidir, abaddır. Bunu mən xüsusi olaraq Zakir Fərəcovun şəhərə icra başçısı təyin olunduqdan sonra gördüm. Sumqayıt demək olar ki, Bakıdan fərqlənmir. Sual versələr ki, hansı şəhərdə qalmaq istəyərsən, yenə də Sumqayıtı seçərəm.
-Türkiyədə ali təhsil almaq üçün proseslər çətindir?
- Təqaüd proqramına müraciət etmək o qədər də asan proses deyil. Burada çox ciddi mərhələlər vardır. Gərəkdir ki, yaxşı nəticələrin ola. Türkiyə Burslarına müraciət 2 mərhələdən ibarətdir: 1-ci mərhələ sənəd mərhələsidir. Bu mərhələ üzrə qiymətləndirmə prosesi 3 ay çəkir. Növbəti 2-ci mərhələ isə müsahibə mərhələsidir. Ümumilikdə 9 aylıq bir prosesdən keçdim. Proseslər dözüm, əzmkarlıq və səbr tələb edir.
-Türkiyədə tələbəlik həyatı necə keçir? Dərs zamanı və dərsdən kənar maraqlı məşğuliyyətləriniz varmı?
- Türkiyədə tələbəlik həyatı çox maraqlıdır. Ankara Universitetinin Hüquq fakültəsinin çox zəngin kitabxanası var. Burada müxtəlif sosial fəaliyyətlərdə iştirak edirəm. Hüquq fakültəsinin təşkil etdiyi beynəlxalq seminar, vebinarlarda iştirak edirəm.
-Təhsilini bitirdikdən sonra planların nədir?
-Azərbaycan Respublikası Dövlət Gömrük Komitəsinin Akademiyasını bitirmişəm deyə, gömrük orqanlarında hüquqşünas kimi çalışmaq kimi planım var. Bundan əlavə, elmi-pedaqoji fəaliyyətlə də məşğul olmaq istərdim. Tələbə kimi 7 elmi məqaləm var, onlardan 4-ü müəllifliklə, 3-ü isə həmmüəllifliklə yazılıb.
-Universitetinin nüfuzunu yüksəldə biləcək hansı ideyaları irəli sürmüsən, bunlardan hansıları real olub?
- Akademiyada təhsil alarkən bir sıra "ilk"lərə imza atmağı bacarmışam. Akademiyanı təmsil etdiyim komandam 2023-cü ildə Beynəlxalq Qızıl Xaç komitəsinin Azərbaycan nümayəndəliyi tərəfindən təşkil edilən " Şıxlinskilər" adına Beynəlxalq Humanitar Hüquq üzrə Milli Müsabiqənin qalibi olmuşdu və kuboku Akademiyamıza gətirmişdik. Həmçinin 2023-cü ildə ADA Universiteti və Bakı Politoloqlar Klubunun təşkilatçılığı ilə keçirilən Ulu Öndər Heydər Əliyevin anadan olmasının 100 illik yubileyi münasibətilə keçirilən "NHN və Brain Ring" yarışmasında iştirak edərək 2-ci yer və gümüş medal qazanmışdım. Həmçinin həyatımda prioritet yeri olan Ümummilli lider Heydər Əliyevin 100 illik yubileyi münasibətilə Azərbaycan Respublikasının Prezidentinin 24 iyun 2023-cü il tarixli 3940 nömrəli Sərəncamı ilə təsis edilmiş "Heydər Əliyev” adına təqaüdə layiq görülən 100 azərbaycanlı tələbədən biri və Akademiyadan isə yeganə tələbəyəm. Bundan başqa, 11.06.2024-cü il tarixində Azedu.az təhsil portalı tərəfindən keçirilən müsabiqə nəticəsində "Brend Tələbə” adına layiq görülən 10 Akademiya tələbəsindən biriyəm. Bu sıranı davam etdirə bilərəm. Əsas onları qeyd etdim.
-Başqa tələbələri ruhlandırmaq üçün onlara nə deyə bilərsiniz?
- Tələbələrə məsləhətim budur ki, bezmədən, usanmadan araşdırma aparsınlar, akademik tədqiqat və dil bacarıqlarını təkmilləşdirsinlər. Hər zaman novator olsunlar. Sosial aktiv olsunlar. Könüllülük proqramlarında iştirak etsinlər. Fundamental bilikləri universitetdə təhsil aldıqları dövrdə formalaşdırsınlar ki, sonra əmək bazarında, təcrübədə onlar üçün çətin olmasın. Hər kəsə elm və təhsil həyatında uğurlar arzulayıram. Çox sağ olun.
-Bizə vaxt ayırdığın üçün təşəkkür edirik.
- Sağ olun.
Söhbətləşdi: Elşən Yəhyayev
Xəbərdən istifadə edərkən istinad etmək vacibdir.
