Bütün ölkə ötən gün Azadlıq prospektində 16 mərtəbəli binada 15 nəfərin ölümü ilə nəticələnən yanğınla bağlı yas içindədir. Bu faciəvi hadisədən sonra Sumqayıtda bir qisim binaların fasadındakı penoplastların sökülməsi işinə başlanılıb. Xatırlayırsınızsa, 2 il öncə Sumqayıtda Heydər Əliyev prospektində beşmərtəbəli bina da bu səbəbdən yanmışdı və həmin vaxt itki olmadığından bu, ölkə səviyyəsində ciddi ajiotaja və həyəcan siqnalına səbəb olmadı...
Artıq səhər saatlarından etibarən Sumqayıtda 3-cü mikrorayon, 34 və 36-cı məhəllərdə binaların üzlüklərinin sökülməsi işlərinə başlanılıb.
Sumqayıt şəhər Mənzil Kommunal Təsərrüfatı İstehsalat Birliyinin rəisi Abid Əliyev Sumqayıt TV-yə bildirib ki, Bakıda ilk dəfə belə üzlüklü binada yanğın baş verəndə ondan istifadə edilməsi dayandırılıb və aidiyyəti qurumlara araşdırma aparmaq üçün müraciət edilib: "Fövqəladə Hallar Nazirliyi bu üzlüklərin binalara vurulmasını dayandırıb və iş apardığımız binaların birinci mərtəbəsinə vurulan üzlükləri sökdürüb. Materialın yanan material olmasını onlar daha yaxşı bilirlər. Mütəxəssis onlardır. Hələ ki, penoplastlardan istifadə edilərək üzlüklər vurulmur. Bu işi dayandırmışdıq. Bu gün isə artıq söküntü işlərinə başlanılıb. Sumqayıtda 12 belə bina var, onlardan 2-si tamamlanmamışdı. Hazırda bu binaların üzlüyünmün sökülməsi prosesi gedir."
Xeberle.com həmin reportajı təqdim edir.
Xəbərdən istifadə edərkən istinad etmək vacibdir.
