Birinci Avropa Oyunlarının başlanmasına 1 aydan da az zaman qalıb. Az sonra bütün dünyanın gözü doğma yurdumuz Azərbaycanda olacaq. Şübhəsiz ki, bu oyunlar vətənimizi dünyada tanıtmaq, ölkəyə turist cəlb etmək baxımından əla bir imkan, vasitə olacaq. Yeri gəlmişkən, ölkəmizin, onun adət ənənələri, ayrı ayrı atributlarının təbliği ilə bağlı bir çox addımlar atılmaqdadır. Bunlardan biri də Bakıda Dənizkənarı Bulvar ərazisində yenicə açılmış mağazadır. Belə ki, Bakı-2015 Avropa Oyunlarının Bulvar ərazisində yenicə açılmış mağazası artıq müştərilərini qəbul etməyə başlayıb. Sevindiricidir ki, həm vətəndaşlarımız, həm də turistlər bu mağazaya böyük maraq göstərir. Çox da uzatmayaraq sizi mağazada satılan Bakı-2015 brendli malların qiymətləri ilə tanış edirəm. 

Şəki kəlağayısı - 40 AZN;
ləçək - 18 AZN;
milli geyimdə gəlincik - 240 AZN;
nərdtaxta - 275;
bruloklar - 4 AZN;
futbolkalar - 12-15;
corab - 5 AZN;
idman çantası - 16 AZN;
baş geyimi - 6 AZN;
naxışlı dəsmal - 13 AZN.
və...
bayraq - 6 AZN(?!);

Bəli, bəli, düz oxudunuz. Azərbaycan Respublikasını bayrağı və məhz əcnəbilərin gəldiyi bir zamanda, təbliğat üçün əla bir fürsət olan bir məqamda... Bu bayrağı 6 AZN-ə, təqribən 6 dollar 10 sentə almaq olar. Sual olunur, əgər bizim əsas borc və vəzifələrimizdən biri təbliğatdırsa, niyə əsas dövlət atributlarımızdan sayılan, uğrunda canımızdan, qanımızdan keçdiyimiz üçrəngli bayrağımızı satmalıyıq?! Və özü də belə "qeyri-müəyyən" qiymətə. Əslində, istənilən rakursdan götürsək, bayraq satışı elə incə bir məsələdir ki, bu mövzuda yaza yaza bəndəniz çox ehtiyat edirəm, çünki burada ortaq ölçü, qiymət meyarı müəyyən etmək çox qəlizdir. Hər birimiz yaxşı bilirik ki, bu bayrağı azad və suveren dövlətdə başıuca, alnıaçıq dalğalandırmaq üçün nələrdən keçmişik...
Çalışacam fikirlərimi aydın izah edim.
Əziz həmvətənlərim, hörmətli bu işə məsul olan şəxslər. Olmazmı ki, Azərbaycan Respublikasının bayrağını əcnəbilərə, ölkəmizi görməyə, tanımağa gələn qonaqlara, sadəcə hədiyyə edək, digər malların üzərində qiymət yazılarkən, bunun da üzərində də "qiymətsiz" etiketi qoyaq. Heç kəsə sirr deyil ki, dövlətimizin büdcəsi buna imkan verər ki, məhz Avropa Oyunları zamanı, təxminən, 50 min bayrağı əcnəbilərə hədiyyə edək. Qoy bunun maya dəyəri olsun 2 manata. Yəni buna dəyməzmi ki, Avropada Azərbaycan bayrağının sayı daha 50 min ədəd artsın?! Buna pul xərcləməyə dəymirsə, ayrı nəyə xərcləməliyik?!
Yaxud, bu bayrağın satılması, ondan əldə olanacaq gəlir çox vacib və mütləqdirsə, olmazmı ki, simvolik, minimum bir rəqəm qoyulsun, tutalım 1 AZN. Bayrağımızı almaq istəyən şəxs onu daha asan və minimum qiymətə ala bilsin.

Bayrağı bayraq edən üstündəki qandır, torpaq uğrunda ölən varsa vətəndir.

Elnur Ağayev
Xeberle.com

Xəbərdən istifadə edərkən istinad etmək vacibdir.