Sumqayıtlılar kart sistemindən nə vaxt istifadə edə biləcək?

Şəhərimiz üçün illərdir problemli məsələlərdən biri də nəqliyyat sisteminin istənilən səviyyədə olmamasıdır. Marşrut abtobuslarının nizamsız idarə edilməsi, harda gəldi saxlayıb sərnişin götürüb-düşürməsi, hətta bəzilərinin bir az da irəli gedib yol hərəkət qaydalarını kobud şəkildə pozaraq başqalarının həyatını təhlükə altına qoyması sumqayıtlıları təbii olaraq narahat edir.

Xoşagəlməz hallardan biri də bir sıra marşrut xətlərində hələ də köhnə avtobusların qalmasıdır. Açığı, bəzi avtobuslar o qədər bərbad gündədir ki, onlara "köhnə” deməyə də adamın dili gəlmir – köhnəlik o maşınlar üçün sadəcə, mübaliğə olar. "Cındırından cin ürkən” bu avtobuslar 6, 8, 15, 25 nömrəli avtobuslar da daha çoxdur.

Məlumata görə, ötən ilin noyabrında Sumqayıtda vətəndaşları qəbul edən Nəqliyyat naziri Ziya Məmmədov da Sumqayıtda bu qədər köhnə avtobusların hələ də xidmət etməsindən təəccübləndiyini bildirmiş, qısa zamanda onların yenilənməsini tələb etmişdi.

Daha bir arxiv materialına baş çəkək: Nazirin səfərindən bir neçə gün sonra əməkdaşımız hansı dəyişikliklərin olacağını öyrənmək üçün Sumqayıt şəhər 8 saylı Sumqayıt Regional MMC ilə əlaqə saxlamışdı. MMC-nin rəisi Mirqamət Şıxəliyev suallarımıza cavabında bunları demişdi:

-Köhnə avtobusların ilin sonuna kimi yenilənməsi planlaşdırılır. Bunun üçün maddi vəsait lazımdır və yenilənmə ilin sonuna kimi həll olunacaq. Köhnə "RAF”lar yenilənəcək.

Göründüyü kimi, rəisin açıqlamasında söhbət 2014-cü ilin sonundan gedir. Ancaq nəinki 2014-cü ilin sonu, 2015-ci ilin az qala yarısı gerridə qalıb, ancaq "köhnə hamam – köhnə tas” və ya bir az başqa cür "yenilənən şəhər – köhnə avtobus”.

Bəs yeni avtobusları nə vaxt üçün gözləyə bilərik?

Görək əlaqədar qurumlar nəyə söz verir?

Sualımızın cavabını 8 saylı Sumqayıt Regional Nəqliyyat MMC-nin Avtobuslarla İş Şöbəsində axtardıq. Şöbə rəisi Ədalət Ağayev: "Avtobusların yenilənməsi prosesi ardıcıl şəkildə aparılır. Bəzi xətlərdə 3-4 köhnə avtobus qalıb. Bu avtobusları sahibkarlar almalıdır. 1 avtobusun qiyməti 45-50 min manatdır, elə də ucuz deyil yəni. Sahibkarlardan avtobusları yeniləmələrini daim tələb edirik. Məsələn, bu günlərdə 15 saylı marşrutun sahibinə yeni avtobuslar gətirməsi üçün bildiriş məktubu göndərdik. Doğrudur, elə yerlər var ki, o ərazilərdə kiçik avtobuslar lazımdır. Məsələn, 42 saylı marşrutun getdiyi ərazilərdə əksər küçələr dardır. Stansiya Sumqayıt, Ceyranbatan kimi ərazilərdə kiçik ölçülü marşrutlar daha çox işə yarayır... Bizdən olsa, avtobusların yenilənməsi prosesini tez, ən qısa zamanda bitirərik”.

Kart sisteminə keçid məsələsinə gəldikdə isə Ədalət Ağayev bildirdi ki, Sumqayıt üçün hələ ki, belə bir müzakirə aparılmır.

Vüsal Məmmədov, "168saat qəzeti”