Dövlətimizin təhsil sahəsində göstərdiyi diqqət və qayğının nəticəsidir ki, ölkəmizdə ümumtəhsil məktəblərinin maddi-texniki bazası möhkəmləndirilir, müasir tələblərə cavab verən yeni təhsil ocaqları tikilib istifadəyə verilir, müəllim və şagirdlərə göstərilən qayğı gündən-günə daha da artır.
Xeberle.com-un əməkdaşı "World” Karyera və Peşə Mərkəzinin rəhbəri, İnnovativ Təhsil İşçiləri Birliyinin rəhbəri, 13 ildir təhsil sahəsində fəaliyyət göstərən sahibkar, təhsil və maarifləndirici istiqamətdə sərgilər, forumlar, seminarlar təşkil edən təhsil işçisi Aygün Məmmədli ilə həmsöhbət olub. Təhsili bir peşə deyil, bir missiya kimi qəbul edən Aygün Məmmədli vurğulayıb ki, təhsil almaq onun üçün davamlı inkişaf və öyrənmə yoludur.
Aygün xanım əməkdaşımızın suallarını cavablandırıb:
- "TəhsildəSƏN forumu” ideyası necə yarandı və əsas məqsədi nədir?
Öncə qeyd etmək istərdim ki, bu forum özünü təhsildə görən hər kəs
üçündür. Özünü inkişaf etdirmək və fikirlərini ictimaiyyətlə bölüşmək istəyən, hər hansı bir təhsil probleminə həll yolu tapmaq və öz təcrübələrini digər təhsil işçilərinə ötürməyi arzulayan, qısası, özünü təhsildə görən hər kəs bu forumda iştirak edir. Elə "TəhsildəSƏN” adı da bundan yaranıb, Təhsildə olanlar və özünü təhsildə görən peşəkar təhsil işçiləri üçündür. Əsas ideya təhsildə olanları bir araya gətirmək və təhsil işçilərinin təcrübələrini bir-biri ilə paylaşmasına şərait yarada bilməkdir.
- Forumda müzakirə olunan əsas mövzular hansılardır və necə seçilir?
Mövzular əsasən gündəmə uyğun olaraq forum keçirilən ildə aktual olan mövzu ətrafında seçilir və təhsil sahəsinə yeni daxil olmuş və təhsil işçiləri tərəfindən zəif və ya natamam mənimsənilmiş mövzular, eləcə də yenilənən və aktuallığını daima qoruyan mövzular ətrafında olur. Bu mövzulara peşə seçimi, imtahan həyəcanı, disleksiya, autizm, inklüziv mühit, nitq mədəniyyəti, pedaqoqikaya yeni yanaşmalar, təshil mərkəzi idarəetməsi, təhsil psixologiyası, EQ və İQ ilə bağlı ən son yeniliklər və bunların təhsildə tətbiqi daxildir.
- Forum vasitəsilə hansı dəyişikliklərə nail olmusunuz və ya olmağı hədəfləyirsiniz?
İlk olaraq ölkəmizdə özəl təhsil sektorunda peşəkar səviyyədə forum təşkil etməklə müəllimlər və pedaqoqlara layiqli bir platforma qurmuşuq. Eləcə də gördüyümüz keyfiyyətli işlərə görə təhsil sektorunda fəaliyyət göstərən dövlət qurumları hər zaman bizim tədbirlərin rəsmi tərəfdaşı olaraq çıxış edir və bununla da özəl sektorla dövlət sektorunda çalışan təhsil içşilərinin bir biri ilə işgüzar əlaqələr qurmasına nail oluruq.
- "World" Karyera və Peşə Mərkəzində gənclərə hansı dəstəklər göstərilir?
Bildiyiniz kimi, bizim təhsil mərkəzimiz illərdir ki, uyğun qiymətə və gənclərin boş vaxtlarına uyğun dərs cədvəlləri ilə onlara rus, ingilis, alman, koreya və çin dillərini tədris edir. Əyani dərslərə gələ bilməyənlər üçün onlayn və canlı, görüntülü dərslər də keçirilir. Eyni zamanda sosial aktiv fəaliyyətlərə diqqət etdiyimiz üçün mərkəzimizin əməkdaşlıq etdiyi qurumların köməyi ilə tələbələrimiz müxtəlif kino , teatr, konsert və festivallarda iştirak imkanı qazanır. Eləcə də xaricdə təhsil üçün lazım olan İELTS, SAT, DUOLİNQO tədris olunur və Türkiyədə, Avropada ali təhsil almaqlarına kömək edirik.
- Təhsil və karyera sahəsində bu qədər fəal olmağınıza nə səbəb oldu?
Pandemiya dönəmi bütün sahələrdə olduğu kimi təhsil sahəsində də dəyişikliklərə yol açdı. Əksər təhsil mərkəzləri bağlandı, kiçildi və ya onlayn olaraq fəaliyyət göstərməyə başladı. Bu anda isə yeni və gənclərdən ibarət komandalar şəklində yeni təhsil mərkəzləri quruldu, hansı ki sektor üzrə təcrübəsiz olduqları üçün qısa müddətdə qoyulan sərmayə düzgün nəticə vermədi. Bunları nəzərə alaraq həm təhsilə yeni yanaşmaların təhsil işçiləri tərəfindən daha dərin mənimsənilməsi, həm də təhsil sektorunda fəaliyyət göstərən şirkətlərin sahibkarlıq mövzusunda təcrübə qazanması və maariflənməsi üçün silsilə tədbirlər təşkil etməyə başladıq.
- Aygün xanım, bu qədər təşəbbüs və layihəsinin içində balansı necə qoruyursunuz?
Mən Azərbaycan Dövlət İqtisad Universitetinin məzunuyam. Bir layihəni icra etmədən öncə, planlama, riskləri gözə alma, zamanın idarə olunması mövzusunda biliklərim olduğundan eyni anda bir neçə layihə icra edilir və hətta eyni anda icra olunduğuna görə zamana və digər resurslara da qənaət olunur. Bundan əlavə, işinə həvəslə yanaşmaq və faydalı olduğunu görmək insanı ilhamlandırır.
- Gələcək üçün hansı yeni layihələr və ya istiqamətlər planlaşdırırsınız?
Öncə qeyd etmək istərdim ki, bu forum özünü təhsildə görən hər kəs üçündür. Özünü inkişaf etdirmək istəyən, fikirlərini ictimaiyyətlə bölüşmək istəyən, hər hansı bir təhsil probleminə həll yolu tapmaq və öz təcrübələrini digər təhsil işçilərinə ötürmək istəyən, qısacası özünü təhsildə görən hər kəs bu forumda iştirak edir. Elə "TəhsildəSƏN” adı da bundan yaranıb. Təhsildə olanlar və özünü təhsildə görən peşəkar təhsil işçiləri üçündür. İstiqamət isə sahə dəyişsə belə, yenə də maarifləndirmə olaraq qalacaqdır.
- Bizə vaxt ayrıdığınız üçün təşəkkür edirik.
Sağ olun.
Xəbərdən istifadə edərkən istinad etmək vacibdir.
