Bu dəfə təhlükə mənbəyi olaraq Sumqayıtda sahibsiz itlərdən deyil, sahibli itlərdən söz açacağıq. Bəli, məhz elə itlər də təhlükə törədir. Bir şərtlə ki, sahibləri onları ağızlıqsız (buruntaq) çölə çıxararlarsa... Şəhərimizdə it həvəskarlarının sayı getdikcə artmaqdadır, bunu müsbət tendensiya kimi qiymətləndirmək olar. Amma bu say artdıqca – ehtiyatsız it sahibləri tərəfindən sakinlərə qarşı təhlükə faizinin da artdığını deməliyik. Ağızlığı olmayan it istənilən məqamda sahibinin əlindən çıxıb istənilən şəxsi – qoca, qadın, uşaq dişləyə bilər. Əcəba, sonra bunun cavabını kim verəcək?
Bir neçə dəfə belə bir halın şahidi olmuşam. Ağızlığı olmayan it dartınıb çıxmaq istəyib, sahibi onu güclə saxlayıb. Əgər bu faciəvi hadisə baş verərəsə, kim daşıyacaq bu məsuliyyəti? Dişləyən itmi? Onun sahibimi? Yoxsa həmin iti sahibi ilə qorunma vasitələri olmadan parka buraxan ictimai asayişin qoruyucuları olan polislərimizmi?
Təklif: bundan sonra parkın girişlərində məlumatverici lövhələr vurulsun! Ağızlığı olmayan itlər parka buraxılmasın.
İndi isti ayları yaşayırıq. Hər kəs səhər axşam həyətdə, park və xiyabanlarda ailəsi, uşağı ilə gəzintiyə çıxır. Bu aylarda risk faktoru daha çoxdur. Hər halda, biz həyəcan təbilini çaldıq. Gerisi şəhər rəhbərliyinin diqqəti və operativ tədbirlərinə qalır.

Elnur Ağayev
Xeberle.com

P.S. Bizdə çox zaman faciə, bədbəxt hadisə baş verir, sonra başlayırıq peşman olmağa, onun səbəb və nəticələri ilə mübarizə aparmağa...
P.S.S. Hətta dünyanın ən böyük şəhərlərindən biri, ən çox it həvəskarının yaşadığı Moskva şəhərində belə artıq əsas parklara nəinki ağızcıqsız, hətta ağızcıqla itlərin buraxılması qadağan olunub.