Bu günlərdə Sumqayıt sakinləri üçün ən önəmli xəbər şəhərə yeni icra başçısının təyinatı oldu. Əvvəlcədən şayiə kimi yayılan xəbər sonradan təsdiqini tapdı. Prezident İlham Əliyevin imzaladığı sərəncamla Zakir Fərəcov Sumqayıta yeni icra başçısı təyin olundu.
Bəs Sumqayıt sakinlərinin yeni icra başçılarından gözləntiləri nədir? İlk olaraq sumqayıtlı jurnalistlərin və müxtəlif peşə sahiblərinin fikirlərini öyrəndik.


Milli.az portalının əməkdaşı Teymur Hacıyev: "Zakir Fərəcovun Sumqayıta icra başçısı təyin olunmasına mən nikbin yanaşıram. Onun öz sələflərindən daha yaxşı olacağını düşünürəm. İlk növbədə ona görə ki, Sumqayıt Bələdiyyəsinin sədri işləyərkən yalnız işgüzar məmur kimi imic formalaşdırmağı bacarıb. Abşeronda gördüyü işlər də təqdirəlayiqdir.
Digər tərəfdən isə, bundan əvvəlki icra başçılarından fərqli olaraq Zakir Fərəcov sumqayıtlıdır. Onun bir neçə ildən sonra başqa yerə getmək kimi bir lüksü yoxdur. O vəzifədə olsa da, olmasa da, sumqayıtlıdır. Bu şəhərdə yaşayacaq, hər gün evindən çıxdıqda şəhərin sakinləri ilə qarşılaşacaq. Yəni öz doğma şəhəri üçün daha da yaxşı işləməkdən başqa çıxış yolu yoxdur.
Başqa bir tərəfdən düşünürəm ki, Zakir Fərəcov Sumqayıtın problemlərini əvvəlki icra başçılarından daha yaxşı bilir. Ona görə də haradan və necə başlamaq gərəkdiyini bilir.
Zakir Fərəcova sələfləri az problemlər qoymayıblar. Düşünürəm ki, aşağıdakı işləri görərsə, şəhərin tarixində ən uğurlu başçı kimi qala bilər:
1. Şəhərdə münbit biznes mühiti yaradılmasına və yeni sərmayələrin cəlb olunmasına nail olmaq. Çünki Sumqayıt turizmdən istehsalata qədər müxtəlif biznes sahələrinin inkişaf etdirilməsi üçün münbit bir məkandır. Bundan başqa, şəhər sakinlərinin intellektual potensialı da buna imkan verir. Bu gün Bakıda istənilən uğurlu şirkətə baxsanız, orada sumqayıtlıların müxtəlif vəzifələrdə çalışdığını görərsiniz.
2. İşsizlik problemini aradan qaldırmaq. Bu gün şəhər sakinlərinin böyük əksəriyyəti hər gün Bakı-Sumqayıt yolunda qalıblar. Həmin vətəndaşları Sumqayıtda işə cəlb edib şəhərin inkişafına nail olmaq olar.
3. Şəhərdəki ekoloji problemləri həll etmək. İstər sovet illərindən, istərsə də, müstəqillik illərində şəhərin üst-üstə yığılmış ekoloji problemləri var. Əvvəlki icra başçılarının vaxtında şəhərdə ağacların kütləvi şəkildə kəsilməsi halları olub. Bu da ekoloji vəziyəti daha da pisləşdirib.
4. Şəhəri tək sürücülər deyil, piyadalar, əlillər və uşaq arabası ilə küçəyə çıxmaq məcburiyyətində olan qadınlar üçün üçün də rahat bir məkana çevirmək. Bu günə qədər şəhərin səkilərinə elə də diqqət yetirilməyib. Mərkəzi küçələrdə bəzək işləri görülsə də, bir qədər kənar küçələr yuxarıda adını çəkdiyim kateqoriyadan olan insanlar üçün az qala cəhənnəmə çevrilib.
 
5. Şəhərdə istilik təchizatı problemini həll etmək. Bu gün Sumqayıtdakı binaların əksəriyyətində istilik təchizatı olmadığı üçün qış aylarında istər mavi yanacağa, istərsə də elektrik enerjisinə israfçılıq edilir. Sakinlərin rahatlıqları da olmur."


Kultura plyus internet televiziyasının redaktoriu, Azərbaycan Jurnalistlər İttifaqıının üzvü Aidə Eyvazlı: "Desəm ki, Zakir Fərəcov Sumqayıta xoş gəlib, düzgün olmaz. Onu hamımız sumqayıtlımız kimi tanıyırıq, öz şəhərindədir. "İşi uğurlu olsun!”- deyirəm. Abşeron Rayonu İcra hakimiyyətinin başçısı olduğu müddətdə, keçən il Abşeron Rayonu ərazisində yerləşən torpaq payımın mənimsənildiyi barədə ona məktub yazdım, cavab vermədi. Zəng vurdum, çox rəsmi danışdı. Sonra cavab gözləmədim. Bildim ki, böyüklərdən çox vaxt cavab almaq çətin olur. Yəqin ki, ötən illər ərzində insanların, köhnə tanışların məktublarına və zənglərinə biganə qalmaq xasiyyətə çevrilib. Artıq heç nə gözləmirəm. Öz tanışlarını və etibarlı adamlarını yanına gətirəcək. Ancaq çox istəyərdim ki, icra hakimiyyətində 20 ildən artıq kök salmış mafiozları və alverçiləri kənarlaşdırsın. 4 ildir ki, 4-cü məhəllənin bərbad günündən, qışda istilik sisteminin olmamasından, yayda ağacların suya həsrət qalmasından, binalarda heç bir cari təmirin aparılmamasından Sumqayıt Şəhər İcra Hakimiyyətinə, kütləvi İnformasiya vasitələrinə yazıram. Nəticəsi yoxdur. Kaş ki, Zakir Fərəcov işə başlayandan sonra, şikayətimizi eşidə. İstəyərdim ki, şəhərimizdə yeni sənaye müəssisələrinin sayını artırılsın, Sumqayıtda yeyinti məhsullarını kütləvi və keyfiyyətli şəkildə istehsal edən, hətta xaricə satış edə bilən müəssisələr açsın. Sirr deyil ki, bizdə istehsal olunan yeyinti məhsullarınım əksəriyyəti keyfiyyətsiz və standartlara uyğun deyil. Ağaclar əkdirsin. Çünki əsil kişidən ev, oğul, kitab və ağac yadigar qalır. Ağac kəsənlərə qarşı kəskin davransın. Sumqayıt səhiyyəsinin özü xəstədir. Bu xəstə səhiyyəmizə bir əncam çəksin ki, xəstəxanalarda, hüquqlarımıza uyğun pulsuz müalicə oluna bilsin vətəndaşlarımız. Bir çox məktəb və ali təhsil ocaqlarında baş alıb gedən rüşvətxorluğun kökünü kəssin. Bildiyim qədər özü gözü tox, doymuş adamdır. Ona da mən də doğma olan şəhərimizə və insanlarımıza, vətəndaşlarımızın hər birinə öz doğması kimi münasibət göstərsin. Sumqayıt şəhəri İcra Hakimiyyətinin binasının əvvəlki görkəmini qaytarmağa çalışsın."

"168 saat" qəzetinin baş redaktoru Vüsal Məmmədov: "Şəhərin ucqarlarına da diqqət ayırsın, infrastrukturu zənginləşdirsin, sosial obyektlər yaradılsın. İnanıram ki, edəcək də. Zakir Fərəcov Sumqayıtı tanıyan, şəhərin problemlərini bilən adamdır. Hesab edirəm ki, bu, işi intensiv və keyfiyyətli qurmağa kömək edəcək."







Azvision.az saytının əməkdaşı Anar Kəlbiyev: "Yeni icra başçısı Zakir Fərəcov Sumqayıta bağlı bir şəxsdir.Belə ki, onun iş kariyerasının əsas hissəsi Sumqayıt şəhəri ilə bağlı olub. Bu baxımdan düşünürəm ki, yeni icra başçısı Sumqayıtı yaxşı tanıyan bir şəxsdir. Şəhərdə infrastruktur baxımından elə ciddi problem görmürəm. Daha yaxşısı icra başçısının yeni iş yerlərinin açılmasına və sayının artırılmasına diqqət ayırmasını gözləyirəm."



Yenilik.az saytının baş redaktoru Xanlar Xoca: "Zakir müəllim Sumqayıtın problemlərini əlinin içi kimi bilir, Sumqayıt əhalisi də onun xarakterini, iş üslubuna, diqqət və qayğısına bələddir. Ona görə də hesab edirəm ki, Zakir Fərəcovun icra başçısı təyinatı Sumqayıtın tarixində ən gözəl hadisələrdən biridir. Bunu dünəndən sosial şəbəkələrdə yazılan rəylərdən də aydın görmək olur ki, insanlar sevinirlər. Ona görə mən Zakir Fərəcovun icra başçısı işləyəcəyi dövrdə Sumqayıtın daha sürətli inkişaf edəcəyinə, daha da abadlaşacağına, ən əsası məmurla, dövlət idarələri ilə vətəndaş arasında münasibətlərin daha keyfiyyətli qurulacağına, ən əsası Sumqayıt sakinlərinin şikayətlərinin kəskin şəkildə azalacağına ümid edirəm və bu ümidlərimin doğrulacağına inanıram."


Maliyyəçi-iqtisadçı Xəyyam Zülfüqarlı: "Sumqayıta sonuncu dəfə sumqayıtlı olaraq Şakir Abışovdan sonra Təvəkkül Məmmədov icra başçısı təyin edilib. Və həmin illərdən bəri sumqayıtlı İcra başçısı görmək sumqayıtlılara qismət olmadı. Amma bu gün artıq öz sumqayıtlımız şəhərimizə rəhbərlik edəcəkdir. Xeyirli ugurlu olsun! Sumqayıt tikiləndən, Sumqayıt ərsəyə gələndən, bu kişi burda işləyib, burda ev alıb və ev verib. Bu Zakir Fərəcovdur. O Fərəcov ki, əvvəllər Mənzil Kommunal İstehsalat Birliyinin rəisi, ilk Sumqayıt şəhər bələdiyyəsinin sədri olub. İlk dəfə məhəllə parklarını sumqayıtlılara qaytaran, bələdiyyə sədri olaraq bələdiyyənin nə olduğunu şəhər ictimaiyyətinə çatdiran insan məhz Zakir Fərəcov olub.  Zənnimcə bu təyinat hər bir sumqayıtlının  ürəyincədir. İnanıram ki, Zakir Fərəcov doğma şəhərimizin daha da inkişaf etməsi üçün var gücü ilə çalışacaq.  Prezidentimizə də sonsuz təşəkkürümü bildirirəm ki, Sumqayıtımızı sumqayıtlıya qaytardı!"



"Səs" TV-nin əməkdaşı Ceyhun Rasimoğlu:  "Prezident İlham Əliyevin icra başçıları ilə bağlı imzaladığı növbəti sərəncam məni çox sevindirdi. İnanıram ki Zakir Fərəcovun Sumqayıt şəhərinə yeni icra başçısı təyin olunması bir çox üstünlüklərə səbəb olacaq. Ən azından biz bu gün Abşeron rayonunda aparılan abadlıq quruculuq islərinin hər birimiz şahidiyik. Ümid edirəm ki, eyni vəziyyət şəhərimizdə də çox sürətlə aparılacaq. Bu gün Sumqayıt şəhərinin dünyaya nümunə bir şəhər olmasına ehtiyac var. Zakir Fərəcovun da bunun öhdəsindən əzmlə gələcəyinə heç bir şübhəm yoxdur. Gözləntilərim odur ki, şəhərin siması dəyişəcək, Sumqayıt öz tarixi vəziyyətinə qayıdacaq. Biz Sumqayıtı belə tanımışıq və sevmişik."

"Qurtuluş" TV-nin əməkdaşı Xuraman Aydın: "Zakir müəllimin jurnalistlərə böyük dəyər verdiyinin şahidiyəm. Fiziki cəhətdən qüsurlu uşaqları sevindirən bir insandır. Haqqı nahaqdan seçən insandır. Bir dəfə qəbulunda oldum. Bir əlili xarici ölkəyə müalicəyə göndərdi. Bunu açıqlamağa da izn vermədi. Amma bu gün bunu mən deyirəm. O insanı 10 günə itirə bilərdik. Amma Zakir müəllimin sayəsində həmin insan yaşayır.

O qədər sevindim ki, Zakir müəllim Sumqayıta icra başçısı gəlir. Sevindim ki, ən azından camaatın qeydinə qalacaq."

Hüquqşünas Ramil Süleymanov: "Zakir Fərəcovdan ciddi gözləntim yoxdur. Onun necə fəaliyyət göstərdiyi bələdiyyə sədri olduğu və Abşeron rayon İcra Hakimiyyətinin başçısı olduğu zamandan əksər neqativ hallarla yadda qalıb. Ona görə ciddi dəyişiklik gözləmirəm. Sadəcə şəhərdə yeni nizamsız, plansız tikinti dalğası geniş vüsət alacağını demək olar. Xırdalanın nəqliyyat sistemini iflic etdiyi kimi Sumqayıtda da bu tendensiyanı görə biləcəyimiz qaçılmaz olacaq.
Ümumiyyətlə bu tip yerdəyişmələrdə heç bir zaman keyfiyyət yüksəlişi olmayıb, əksinə sahibkarlara ciddi maliyyə zərərlərinə başa gəlib."
 

Mia.az saytının redaktoru Zaur Əhməd: "Zakir Fərəcovdan gözləntim böyükdür. Düşünürəm ki, ilk vaxtlar çətin olacaq. Xeyli problemlər qalıb, həll etmək lazımdır. Amma Zakir Fərəcovu daha pozitiv başçı olacağınü düşünürəm."





Rekord.az saytının redaktoru Anar Xanlarov: "İlk öncə Zakir müəllimi təbrik edirəm yenidən doğma şəhərinə döndü. Məncə tam layiqli və ədalətli təyinatdır. Çünki Sumqayıtın problemini sumqayıtlıdan başqa heç kim bilə bilməz. Eləcə də can yandırmaz. Zakir Fərəcov hələ Sumqayıt Bələdiyyəsinin sədri işlədiyi dönəmdə özünü öz işi ilə sübut etmişdi. Məhz onun dövründə Sumqayıt Bələdiyyəsi Azərbaycanın ən yaxşı bələdiyyəsi seçilmişdi. Fərəcov həm də zəhmətkeş kadrdı ki, bu da təsadüfi deyil. Çünki onun həyat fəaliyyəti ilə tanış olanda gördüm ki, indiki yerə pillə-pillə əziyyətlə gəlib. Təsəvvür edin ki, bu adam 1971-ci ildə Superfasfot zavodunda fəhlə işləyib. Yəni fəhləlikdən bu pilləyə gəlib. Sumqayıtın hər tinini hər dalanını tanıyır və Sumqayıtın hər daşı onun üçün dəyərlidir. Gözləntilərim nədir? Açığı çox şey. İlk növbədə bizim icra hakimiyyətimizin əvvəllki görünüşünü özünə qaytarsın. İkincisi qanunsuz tikililərin qarşısını alsın. Çünki şəhərdə səki qalmayıb hamısı satılıb qurtarıb. Çox istərdim ki, Sumqayıtda da iri ticarət-əyləncə mərkəzi açılsın. Adi bolinq oynamaq üçün camaat Bakıya getməsin. Nəqliyyat sistemini qaydaya salsın, bu sektordakı özbaşınalığa, intizamsızlıa son qoyulsun. Şəhər stadionumuzun yenidən qurulması üçün öz səylərini əsirgəməsin. Böyük-böyük şirkətlərin, brend frmaların Sumqayıtda filiallarının açılması üçün bacarıını ortaya qoysun. Ən əsası, şəhərimizdə daha çox iş yerlərinin açılması üçün bütün bacarığını ortaya qoysun. Bilirəm işi çox çətin və məsuliyyətlidir. Bu çətin işində ona ancaq uğurlar arzulayıram!

Dünya” TV-nin Xəbərlər departamentinin direktoru Nizami Rəsulov: "Müsbət dəyişikliklər gözləyirəm və bunada əminəm. Mən 6 ildir ki Abşeron rayonundan reportajlar hazlrlayıram. Hər dəfə abadlıq və quruculuğun daha geniş vüsət aldığının sahidi oluram. İnanıram ki, bu cür müsbət halları Sumqayıtın timsalında da görmək olacaq."




Bakupress.az saytının baş redaktoru Şəfəq Ağacan: "Zakir Fərəcov məncə Sumqayıt üçün düzgün təyin edilmiş başçıdır. Çünki Sumqayıtda püxtələşmiş bir dövlət qulluqçusudur. Ən azından bu şəhərin problemləri sakinlərin xüsusiyyətini yaxşı bilir. Mən bir sumqayıtlı kimi Zakir Fərəcovdan şəhərimiz üçün çox müsbət addımlar gözləyirəm."




Pedaqoq İsmayıl Kərimov: "Bu barədə nəsə demək çox çətindir. Yerli icra hakimiyyətində bəzi kadr dəyişikliklərindən başqa xüsusi bir gözləntim yoxdur. Yəni hansı dəyişikliklərin ölacağını proqnozlaşdırmaq da çətindir."





ORCTV-nin əməkdaşı Abbasəli Hüseynli: "İlk olaraq, gələnə xoş gəlmisən deyərlər. Mən də öz növbəmdə yeni icra başçısını salamlayıb, işində uğurlar diləyirəm. Amma el arasında belə bir söz mövcuddur, "gedənə rəhmət diləyərlər". Ümid edirik ki, Zakir Fərəcov bu steroitipləri öz müsbət işləri, şəhər sakininə xidməti ilə sındırıb, Sumqayıt əhalisinin alqışını qazanacaq. Pozitiv insan olduğumdan, ümid edirəm ki, yeni başçı ondan gözləniləri yerinə yetirəcək. İnsana qiyməti gördüyü işə görə verərlər. Hələ nəyisə demək tez olar."

Azərbaycan Vəkillər Kollegiyasının üzvü, vəkil Anar Qasımlı: "Sumqayıtın icra başçısının dəyişməsi və bu posta şəhərin keçmiş bələdiyyə sədrinin gətirilməsi uzun müddətdir ki, mənim ən böyük arzularımdan biri sayılır. İntuisiyam deyirdi ki, bu nə vaxtsa olacaq. Bu gün arzum baş tutdu.
Səbəb çox sadədir. Deməli, Zakir Fərəcov bələdiyyə sədri olarkən torpaq sahələrinin vətəndaşlara ayrılması barədə imzaladığı qərarların əksəriyyətinin qanuniliyi ondan sonrakı bələdiyyə sədri tərəfindən mübahisələndirildi, çoxsaylı məhkəmə çəkişmələri oldu, sakinlər əziyyət və xərc çəkdilər. Məhkəmələrdə tez-tez eşidirdim: "bu əvvəlki sədrin vaxtında olub", "o vaxt torpaqların hansı prinsiplə paylandığını hamımız bilirik" və s. Həmişə arzulayırdım ki, Zakir Fərəcov Sumqayıtın icra başçısı olsun, xüsusən də indiki bələdiyyə sədri ilə paralel müddətdə. "Dua"ların geriyə oxunmasını duymaq həvəsim vardı. Mənə hadisələrin bundan sonrakı inkişafı maraqlıdır."


Liderxeber.az saytının baş redaktoru Səbuhi Vaqifoğlu: "Zakir Fərəcov Sumqayıt ictimaiyyətini tanıyan adamdır, Sumqayıt ictimaiyyəti də onu yaxşı tanıyır, Çünki o, Sumqayıtda bir neçə vəzifələrdə yer tutub, xüsusən də 1999-cu ildə keçirilən bələdiyyə seçkilərində iştirak edib və Sumqayıt şəhər bələdiyyəsinin sədri seçilib və bu istiqamətdə işlər görüb. Nəzərə alsaq ki, hal-hazırda Sumqayıt ictimaiyyətinin əksəri Eldar Əzizovun bu postdan getməsi lehinə idi və bu da oldu, Ümid edirik ki, Zakir Fərəcov gəlişi ilə Sumqayıtda olan boşluqları aradan qaldıracaq."
PR mütəxəssisi Afət Yaqubova: "Amma hər halda sumqayıtdan çıxan, sumqayıtda yaşayan və buranın dərdi-sərinə bələd biri kimi müvəqqəti qazanc yeri kimi baxmayacağına ümid edirəm. Ümumiyyətlə yerli idarəetmə tərəfdarıyam. Amma bizdə bu olmadığı üçün təyin edilən başçıların həmin yerdən olmasının vacibliyini düşünürəm. Və bir də ümid edirəm ki özündən əvvəlki başçının qoyduğu bardürləri, daşları, kosmetik təmir etdiyi binaları yenidən söküb, büdcə hesabına təmir etməyəcək."



"Əlil Sahibkarlar Təşkilatı” İçtimai Birliyinin sədri Mirzə Məmmədvəliyev: "Sumqayıt Zakir Fərəcovla bərabər böyüyüb və xələfi həmkarıyla münasibətdə doğmalaşmış şəhəri yaxşı tanıdığından sumqayıtlıları qıcıqlandıracaq tort və kabab aksiyaları gözlənilmir. QHT-lərlə münasibətdə canlanma gözləmək olar. Əlilliyi olan veteran və şəxslərimiz diqqət mərkəzində olacağına ümid etmək olar."


Xeberle.com portalının baş redaktoru Elnur Ağayev: "Əvvəla, yeni icra başçımız Sumqayıtımıza xoş gəlib. Ondan ilk istəyim budur ki, şəhərin simvolları və idollarına toxunmasın. Əksinə, icra hakimiyyətinin bozaran, standart binasının görkəmini əvvəlki təbii - yaşıl vəziyyətinə qaytarsa, sumqayıtlıların qəlbində ömürlük yuva qurardı. Məhəllədaxili yollara, binaların damına və zirzəmilərinə əl gəzdirsə, bizləri sevindirərdi. Binaların bloklarına və həyətlərə işıq çəkdirsə,çoxlarının sevincinə səbəb olar. Xiyaban və səkilərin üzərində obyekt tikintisinə imkan verməsə və yaşıllıq zolaqlarını artırsa, ona hörmətimiz daha da artardı. Gənclərin istirahəti, asudə vaxtlarının səmərəli keçirmələri üçün müvafiq məkanların, əyləncə mərkəzlərinin yaradılması üçün investorları cəlb etsə, Sumqayıt gənclərinin nüfuzunu qazanardı. Sumqayıtın turizm potensialını nəzərə alaraq dəniz sahili boyunca səliqə sahmanın yaradılması, dəniz suyunun təmizlənməsi, orada 2, 3 və 4 ulduzlu otellərin açılması üçün güzəştli şərtlərlə investisiyaların yatırılmasına köməklik və dəstək verməsi hər bir Sumqayıt sakininin ürəyincə olardı. Bununla da Sumqayıt turizm şəhərinə çevrilərdi. Şəhərin nəqliyyat sistemində köklü dəyişikliklər və islahatlar aparılmalıdır. Sumqayıtın ən böyük problemlərindən biri isə kosmos əsrini yaşadığımız halda hələ də şəhərin böyük hissəsinin istilik sistemi ilə təchiz olunmamasıdır. Hər halda şəhərimizdəki fəaliyyətini daha çox ictimai rəy üzərində qursa, Sumqayıt gənclərinin potensialından daha çox istifadə edə bilsə, daha çox uğur və hörmət qazanar. Ona uğurlar arzulayıram."
Ramil Zeynallı
Xeberle.com

Xəbərdən istifadə edərkən istinad etmək vacibdir.