Sumqayıtın yeni icra başçısı şəhərə təyin olunandan bu yana qəfil, gözlənilməz qərarları ilə yadda qalmaqdadır. Bu gün xəbər yayılıb ki, Zakir Fərəcov Sumqayıt şəhəri boyu bütün irili-xırdalı tikinti işlərinin dayandırılması göstərişini verib. Amma ilk olaraq o, şəhər icra hakimiyyəti binasının qarşısından keçən yolu – vaxtilə sabiq icra başçısı Eldar Əzizov tərəfindən Bayraq meydanı edilən və avtomobil yolu olaraq qapadılan yolu açdırıb. Bir çoxları, xüsusən sürücülər bu qərarı alqışlasalar da, sakinlərin digər qismi bunu tələsik və lazımsız addım kimi qiymətləndiriblər. Bunu sosial şəbəkələrdə qeyd olunan fikirlərdən, apardığımız sorğudan, camaat arasında dolaşan mövqedən açıq-aşkar anlamaq mümkündür. Onlar vurğulayıblar ki, hər bir şəhərin meydanı olmalıdır və o meydanda insanlar rahat şəkildə ailə, uşaqları isə istirahət etməlidirlər. Oradan avtomobillərin keçməsi isə doğru deyil. "2-3 dəqiqə vaxt itkisinə görə insanların həyatını təhlükəyə atmaq olmaz, onsuz şəhərimizin küçələri genişdir, tıxac falan problemi də olmadığından, buradan avtomobil keçməməsinin ciddi bir maneəsi də mövcud deyildi. Onlar misal olaraq Bakıda Nizami küçəsində olan Fəvvarələr meydanını göstərərək oradan avtomobil keçməsinin mümkünsüz olduğunu söyləyiblər. Ən əsası, Bayraq meydanına yenidən "avtoş”ların yığılacağından, oranı yarış meydanına çevirəcəklərindən narahatdırlar. Bəzi sakinlər bu addımla qismən razılaşsalar da, vurğulayıblar ki, meydana maşınların yığılması, orada dayanması çox mənfi haldır; yaxşı olardı ki, bu haqda müvafiq işarə qoyulsun və avtomobillər sadəcə bir yerdən hərəkət etsinlər. Üstəlik, bəzi sumqayıtlılar qeyd edibnlər ki, bu yol avtobobillər üçün açılmağa hələ tam hazır deyildi. Belə ki, əsas yol işarələrindən olan işıqforlar bu yolu nizamlamır.
Yəni bu da əlavə təhlükə mənbəyi olaraq qalır. Sakinlərin bəziləri isə bu yolun açılmasındansa, yeni başçının elə Bayraq meydanına yüngül "əl gəzdirməsini” təklif ediblər: "Yaxşı olardı ki, tez-tələsik yolu açmaqdansa, o meydanın kənarlarında sakinlərin rahat istirahətləri üçün fəvvarələr düzəldilər, skamyalar qoyulardı, yenilik edilərək WI-Fi sistemi quraşdırılardı. Bu da doğma Sumqayıtımız üçün bir yenilik olardı.”
Yeri gəlmişkən, Sumqayıt TV mövzu haqda həmin ərazidən sorğu keçirib. Xeberle.com həmin sorğunu təqdim edir.